بيشىمباەۆ ىسىندە تانىلعان ساراپشى حاليمنازاروۆ: شەرزاتتى قۇتقارۋعا بولار ەدى

فوتو: جوعارعى سوت

2025 جىلعى 23 مامىردا تاۋەلسىز سوت-مەديتسينالىق ساراپشى تاحير حاليمنازاروۆ شەرزات پولاتتىڭ ولىمىنە سەبەپ بولعان جاراقاتتارىنا قاتىستى سوتتا جاۋاپ بەردى, دەپ حابارلايدى qandastar.kz Zakon.kz-كە سىلتەمە جاساپ.

ول جابىرلەنۋشى تاراپتىڭ ادۆوكاتتارىنىڭ ءوتىنىشى بويىنشا قوسىمشا تاۋەلسىز سوت-مەديتسينالىق ساراپشى رەتىندە جاۋاپقا تارتىلدى.

وتىرىستا اۋەلى ادۆوكات مەيىرمان شەكەەۆ تاحير حاليمنازاروۆ جاساعان قورىتىندىنى وقىپ بەردى. وندا ساراپشى شەرزات پولاتتىڭ كەۋدە تۇسىنا سالىنعان جارا مەن كوپ مولشەردەگى قان جوعالتۋدىڭ سالدارىنان كوز جۇمعانىن راستاعان.

«كەۋدە تۇسىنداعى پىشاق جاراقاتى وكپەنى زاقىمداپ, ىشكى قان كەتۋگە اكەلگەن. بۇل ونىڭ ولىمىنە سەبەپ بولدى, سەبەبى ول كوپ قان جوعالتقان. ساراپتاما كەزىندە وكپەقاپ قۋىسىندا 1,5 ليتر قان تابىلدى. ادام 500–600 ميلليليتر قان جوعالتقاندا-اق جاعدايى كۇرت ناشارلايدى. ال 1 ليتردەن استام قان جوعالتۋ – ومىرگە قاۋىپ توندىرەدى. ەگەر وعان 30 مينۋت ىشىندە شۇعىل مەديتسينالىق كومەك كورسەتىلىپ, جەدەل وتا جاسالسا – شەرزات پولاتتى قۇتقارۋعا بولار ەدى. ول اۋرۋحاناعا كلينيكالىق ءولىم جاعدايىندا جەتكىزىلگەن» – دەپ وقىدى قورىتىندىنى مەيىرمان شەكەەۆ.

سوتتا ءوز قورىتىندىسىنا تۇسىنىكتەمە بەرگەن تاحير حاليمنازاروۆ باسقا ءۇستىرت جاراقاتتاردىڭ ءجاسوسپىرىمنىڭ ومىرىنە قاۋىپ توندىرمەگەنىن ايتتى.

«وكپە تىنىس الۋ جولدارىمەن بايلانىستى بولعاندىقتان, شەرزات تىنىس العاندا اۋزىنان قان كەتكەن. ول سىرتتان ەمەس, ىشتەن كەتكەن قاننان قايتىس بولدى. دەنەسىنىڭ ىشىندە 1,5 ليتر قان جينالعان, بىراق اۋرۋحاناعا جەتكىزىلگەنگە دەيىن قانشا جوعالتقانى بەلگىسىز. مۇنداي جاعدايدا ادامدى قانداي ۋاقىت ارالىعىندا قۇتقارۋعا بولاتىنىنا ناقتى كريتەري جوق – ءبارى ونىڭ فيزيولوگياسىنا بايلانىستى. ەگەر اۋرۋحاناعا 10 مينۋتتىڭ ىشىندە جەتكىزىلسە, ءومىرىن ساقتاپ قالۋعا بولار ەدى. ەڭ باستىسى – قان كەتپەي تۇرىپ شۇعىل كومەك كورسەتۋ. شەرزاتتى جىلدام جاسالعان وتا ارقىلى امان الىپ قالۋعا بولاتىن ەدى. سونىمەن قاتار جارالاردىڭ سالىنۋ رەتىن انىقتاۋ مۇمكىن ەمەس – ءبارى جاڭا. ەگەر ادام ءتىرى بولىپ, ساۋىعۋ ساتىسىندا بولسا, جارالاردىڭ ۋاقىتىن شامالاپ ايتۋعا بولار ەدى, ال بۇل جاعدايدا – ادام قازا تاپقان», – دەدى تاحير حاليمنازاروۆ.

ايىپتالۋشىلاردىڭ ءبىرىنىڭ ادۆوكاتى ساراپشىدان شەرزاتتىڭ قولىنداعى سىزاتتار كاستەتتەن بولۋى مۇمكىن بە دەپ سۇرادى. ساراپشى بۇل سۇراققا جاۋاپ رەتىندە: «كاستەتپەن ادەتتە جاراقات سالادى, ال ادام ول ارقىلى ءوزى جاراقات الۋى مۇمكىن ەمەس, بۇل ەكىتالاي» دەپ جاۋاپ بەردى.