جاڭالىقتار
بيشىمباەۆ پەن بايجانوۆتىڭ اپەللياتسياسى: سوت شەشىمى شىقتى
استانادا قۋاندىق بيشىمباەۆ پەن باقىتجان بايجانوۆتىڭ اپەللياتسيالىق شاعىمى بويىنشا سوت وتىرىسى اياقتالدى,-دەپ حابارلايدى Qandastar.kz
توراعالىق ەتۋشى سۋديا ءبىرىنشى ينستانتسياداعى سوت شەشىمىن وزگەرىسسىز قالدىردى. سۋديا بۇل شەشىمىن تۇسىندىرۋىندە ءبىرىنشى ينستانتسياداعى سوت ۇكىمىن پروتسەستىك ەرەجەلەر بۇزىلعاندا عانا وزگەرتىلەتىنىن ايتتى. ايتا كەتەيىك, 10 ماۋسىم كۇنى استانا سوتىنا قۋاندىق بيشىمباەۆ پەن باقىتجان بايجانوۆتىڭ ءىسى بويىنشا اپەللياتسيالىق شاعىم ءتۇستى. ءوتىنىش بەرۋشىلەر: باقىتجان بايجانوۆتى ءىس-ارەكەتىندە قىلمىس قۇرامىنىڭ بولماۋىنا بايلانىستى اقتاۋدى; قۋاندىق بيشىمباەۆتىڭ قىلمىستىق كودەكستىڭ 99-بابى 2-بولىگىنىڭ 5-تارماعى بويىنشا ايىپتاۋ بولىگىندەگى ۇكىمىن (اسا قاتىگەزدىكپەن كىسى ءولتىرۋ) قىلمىستىق كودەكستىڭ 106-بابى 3-بولىگىنە (ابايسىزدا جابىرلەنۋشىنىڭ ولىمىنە اكەپ سوقتىرعان دەنساۋلىققا قاساقانا اۋىر زيان كەلتىرۋ) قايتا سارالاپ, وزگەرتىلگەن بىلىكتىلىككە سايكەس جازانى ازايتۋدى, سونداي-اق ءىستى جاڭا قاراۋعا جىبەرە وتىرىپ, ۇكىمنىڭ كۇشى جويۋدى سۇرادى.
وسىعان دەيىن جوعارعى سوتتىڭ قىلمىستىق ىستەر جونىندەگى سوت القاسىنىڭ توراعاسى نازگۇل راحمەتۋللينا قۋاندىق بيشىمباەۆقا قاتىستى اپەللياتسيا ءبىر ايعا سوزىلاتىنىن ايتتى. بۇگىن, 26 ماۋسىمدا ەلوردالىق سوتتا قۋاندىق بيشىمباەۆ پەن باقىتجان بايجانوۆتىڭ ءىسى بويىنشا اپەللياتسيالىق شاعىمدى قاراۋ باستالدى.
