بيشىمباەۆتىڭ ادۆوكاتى “كاسىبي شەبەرلىگى ءۇشىن” مەدالىمەن ماراپاتتالدى

فوتو: اشىق دەرەككوز

رەسپۋبليكالىق ادۆوكاتتار القاسى ەكس-مينيستر قۋاندىق بيشىمباەۆتىڭ ادۆوكاتى ەرلان عازىمجانوۆقا “كاسىبي شەبەرلىگى ءۇشىن” مەدالىن تابىستادى, دەپ حابارلايدى  qandastar.kz  Dalanews.kz-كە سىلتەمە جاساپ.

Buzyq تەلەگرام-ارناسىنىڭ مالىمەتىنە سۇيەنسەك, ماراپاتتى القا توراعاسىنىڭ ورىنباسارى ءارى نۇكەنوۆتەر وتباسىنىڭ ادۆوكاتتارىنىڭ ءبىرى يگور ۆرانچەۆ ۇسىنعان.

“بۇل ماراپات – ەڭبەگىم مەن جەتىستىكتەرىمنىڭ بەلگىسى. سونىمەن قاتار ادامداردىڭ قۇقىعى مەن بوستاندىعىن قورعاۋ جولىنداعى قىزمەتىمدى ارى قاراي جالعاستىرۋىما شابىت سىيلاماق”, — دەپ اتاپ ءوتتى ەرلان عازىمجانوۆ.

ايتا كەتەيىك, ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن 24 جىلعا باس بوستاندىعىنان ايىرىلعان ەكس-مينيستر قۋاندىق بيشىمباەۆتى ادۆوكات لەيلا رامازانوۆا, نازكەن قۇسايىنوۆا, ەرلان عازىمجانوۆتار قورعاعان ەدى.

وسى تۇستا رەسپۋبليكالىق ادۆوكاتتار القاسىنىڭ توراعاسى ايدىن بيكەباەۆ ارىپتەستەرىنە ۇندەۋ جولداعان بولاتىن.

جيىندا «بيشىمباەۆ ىسىنە» باس سۇققان ادۆوكاتتاردى جاريا تالقىلاۋدى توقتاتۋ تۋرالى ماسەلە قوزعالدى. ول اتالعان وقيعا ادۆوكاتتاردىڭ كاسىبي ادەبىنە نۇقسان كەلتىرىپ جاتقانىن اتاپ وتكەن ەدى.

«ادۆوكاتتاردى بيشىمباەۆ ىسىنە قاتىساتىن ارىپتەستەرىن جاريا تالقىلاۋدى توقتاتۋعا شاقىرامىن. بۇل ارەكەتتەر كاسىبي ادەپ كودەكسىن بۇزۋعا اكەلۋى مۇمكىن. ءار نارسەنىڭ شەگى بولۋى كەرەك. ءاربىر ادۆوكات ادۆوكاتۋرانىڭ بەدەلىن ويلاۋى ءتيىس», — دەپ مالىمدەگەن بولاتىن.

ەسكە سالايىق, بىلتىر قۋاندىق بيشىمباەۆ ايەلى سالتانات نۇكەنوۆانى ءولتىردى دەگەن كۇدىكپەن قاماۋعا الىندى. وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.

بيشىمباەۆقا ەكى باپ بويىنشا ايىپ تاعىلدى:

• اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ);
• قورلاۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).

13 مامىردا بيشىمباەۆ ءىسى بويىنشا ۇكىم شىققان بولاتىن. القابيلەر شەشىمى بويىنشا, بيشىمباەۆ 24 جىلعا, بايجانوۆ 4 جىلعا باس بوستاندىعىنان ايىرىلدى.