بيشىمباەۆتىڭ وتباسى ساراپتاما قورىتىندىسىن وزگەرتۋ ءۇشىن BAU مەيرامحاناسىن بەرمەك بولعان

كوللاج: turkystan.kz

بيشىمباەۆتىڭ وتباسى سوتتا ساراپتاما قورىتىندىسىن وزگەرتۋ ءۇشىن BAU مەيرامحاناسىن بەرۋگە دايىن بولعان, دەپ حابارلادى qandastar.kz سايتى Stan.kz-كە سىلتەمە جاساپ.

8 مامىردا قۋاندىق بيشىمباەۆتىڭ اتا-اناسىنىڭ قايرات كەمەلوۆكە قارسى ازاماتتىق شاعىمى بويىنشا سوت وتىرىسى ءوتتى. قايرات كەمەلوۆ – بيشىمباەۆتاردىڭ تۋىسى ءارى سالتانات نۇكەنوۆانىڭ ولىمىنە قاتىستى سوتتا كۋالىك بەرگەن سوت-مەديتسينالىق ساراپشى تاحير حاليمنازاروۆتىڭ ارىپتەسى.

اتا-اناسى بيشىمباەۆتىڭ بەدەلىن قورعاۋ ماقساتىندا بەرگەن ازاماتتىق شاعىمنىڭ سەبەبى قايرات كەمەلوۆتىڭ ولار جونىندە ايتقان مالىمدەمەسى. كەمەلوۆ ءوز سوزىندە بيشىمباەۆتىڭ اتا-اناسى ونىڭ كومەگىمەن ساراپتاما قورىتىندىسىن ۇلدارىنىڭ پايداسىنا قولدان جاساۋ ءۇشىن اقشا ۇسىنباق بولعانىن ايتقان ەدى.

سوتتا قايرات كەمەلوۆتىڭ جۇبايى بەكزات كەمەلوۆا كۋاگەر رەتىندە جاۋاپ بەردى.

«قۋاندىق بيشىمباەۆتىڭ اناسى ءتىپتى «بولماسا, BAU مەيرامحاناسىن تولىعىمەن اتىنا جازىپ بەرەمىز» دەپ ۇسىنىس ايتتى. بۇل — نۇرلىبەكوۆانىڭ (بيشىمباەۆتىڭ اناسى) سوزدەرى. ولار ساراپتاما قورىتىندىسى ءوز پايداسىنا شىققانىن قالادى, ياعني, نۇكەنوۆا بيىكتىكتەن ءوزى قۇلادى دەگەن قورىتىندى جاسالۋى ءۇشىن», – دەيدى كەمەلوۆا.

بيشىمباەۆتاردىڭ ادۆوكاتى ەرلان عازىمجانوۆتىڭ ايتۋىنشا, جاۋاپكەردىڭ جۇبايى بيشىمباەۆتار مەن كەمەلوۆتىڭ اراسىنداعى اڭگىمە بولعان ۋاقىتتا ول جەردە بولماعان, سوندىقتان ونىڭ كۋالىگى دالەل رەتىندە قاراستىرىلماۋى ءتيىس.

«كەمەلوۆ 2023 جىلى 9 قاراشادا سالتانات نۇكەنوۆانىڭ قازا بولعان كۇنىندە, مارقۇمنىڭ ولىمىنەن كەيىن بيشىمباەۆتاردىڭ ۇيىنە بارعانىن, سول كۇنى ولار وعان وسىنداي ۇسىنىس جاساعانىن ايتتى. الايدا بۇل اقپاراتتى دالەلدەيتىن ەشبىر ايعاق جوق, تەك جاۋاپكەردىڭ اۋىزشا, دالەلسىز مالىمدەمەسى عانا بار. BAU مەيرامحاناسىن تەك «باسىن سوعىپ العان بولۋى مۇمكىن» دەگەن ءسوز ءۇشىن جەكەمەنشىك ساراپشىعا قالاي بەرۋگە بولادى? ادام ءوز بەتىمەن قۇلاپ كەتۋى مۇمكىن ەكەنىن بىلەمىز, بىراق بۇل اۆتوماتتى تۇردە ادامدى اقتايدى دەگەن ءسوز ەمەس. وسى ءۇشىن مەيرامحانامەن تولەم جاساۋ كەرەك پە? ەگەر كەمەلوۆ بىلگەندە, وعان قۇجاتتار ۇسىنىلار ەدى, BAU مەيرامحاناسى بيشىمباەۆقا تيەسىلى ەمەس. ونى باسقا ادامنىڭ اتىنا وتكىزۋ مۇمكىن ەمەس. ول تەك «گاستروتسەنتردەن» جالعا العان ورىن عانا, ال «گاستروتسەنتردىڭ» بىرنەشە قۇرىلتايشىسى بار. بيشىمباەۆ سول جەردە تەك تاماق ساتۋمەن اينالىسقان. بۇل جالعا الىنعان ورىندى قايتا جازىپ بەرۋ مۇلدە مۇمكىن ەمەس», – دەيدى ادۆوكات.

جاۋاپكەردىڭ ادۆوكاتى يگور ۆرانچەۆ ارىپتەسىنىڭ دالەلدەۋ مىندەتى تۋرالى ايتقان سوزدەرىن تەرىسكە شىعارىپ, تالاپكەرلەر ونىڭ قورعاۋشىسىنىڭ سوزدەرىنىڭ وتىرىك ەكەنىن دالەلدەي المايتىنىن مالىمدەدى. ۆرانچەۆتىڭ ايتۋىنشا, BAU مەيرامحاناسىنىڭ بيشىمباەۆقا تيەسىلى ەكەنى بيشىمباەۆ ءىسى بويىنشا سوتتا انىقتالعان.

«ماسەلە وسىنداي اقپاراتتىڭ جاريا بولۋى تالاپكەرلەردىڭ ابىرويىنا نۇقسان كەلتىرە مە? مەنىڭ ويىمشا, بۇل جاعدايدا ولاردىڭ ابىرويىنا ەشقانداي قاۋىپ ءتونىپ تۇرعان جوق, ويتكەنى ولاردىڭ ابىرويى, ەگەر ولار وزدەرىندە ونداي نارسە بار دەپ ەسەپتەسە, ولاردىڭ ۇلى ءبىرىنشى رەت سوتقا تارتىلعاندا-اق بۇزىلعان ەد. سوندىقتان ولاردىڭ ابىرويى نەمەسە قادىر-قاسيەتى تۋرالى ايتۋ ماعىناسىز دەپ ەسەپتەيمىن. وسىعان بايلانىستى, قۇرمەتتى سوت, تالاپكەر تاراپىنان كايرات كەمەلوۆ بەرگەن سۇحباتتاعى اقپاراتتىڭ شىندىققا سايكەس ەمەستىگى تۋرالى ەشقانداي دالەلدەر ۇسىنىلمادى», – دەدى ادۆوكات.

سوت شەشىم شىعارۋ ءۇشىن كەڭەسۋ بولمەسىنە كەتتى, ونىڭ ناتيجەسى بەس جۇمىس كۇنى ىشىندە جاريالانۋى ءتيىس