جاڭالىقتار
بيىل 685 اۋىل ينتەرنەت جەلىسىنە قوسىلادى
2019 جىلدىڭ سوڭىنا دەيىن 685 اۋىل ينتەرنەت جەلىسىنە قوسىلادى.
بۇل تۋرالى بۇگىن ۇكىمەت وتىرىسىندا قازاقستاننىڭ ەلدى مەكەندەرىندە كەڭ جولاقتى ينتەرنەتتى دامىتۋ جونىندە بايانداماعان قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ ايتتى, دەپ حابارلايدى قازاقپارات.
«ەلباسىنىڭ تاپسىرماسىن جانە تسيفرلى قازاقستان مەملەكەتتىك باعدارلاماسىن ىسكە اسىرۋ اياسىندا, ءبىز قازاقستان رەسپۋبليكاسىنىڭ ەلدى مەكەندەرىن ينتەرنەت قىزمەتتەرىمەن قامتۋ بويىنشا جوسپارلى جۇمىستار جۇرگىزىپ جاتىرمىز. قازىرگى تاڭدا ەلىمىزدە 117 قالا مەن 3 324 اۋىلدا كەڭ جولاقتى ينتەرنەت قول جەتىمدى. ول ءارتۇرلى تەحنولوگيالارمەن قامتاماسىز ەتىلگەن, سولاردىڭ ىشىندە تالشىقتى-وپتيكالىق جەلى, 3G جانە 4G جەلىلەرى بار», -دەدى ول.
ءمينيستردىڭ دەرەگىنشە, 2018 جىلى قازاقستان الەمدىك رەيتينگتە ۇيالى بايلانىس ابونەنتتەرى بويىنشا 21-ءشى ورىنعا يە بولدى. قازاقستاندا ينتەرنەت پايدالانۋشىلار سانى 2018 جىلى 81,3 پايىزعا جەتتى جانە الەمدىك رەيتينگتە قازاقستان 45-ءشى ورىنعا كوتەرىلدى.
«اۋىلدىق جەرلەردى كەڭ جولاقتى ينتەرنەتپەن ارى قاراي قامتۋ ءۇشىن 2018-2021 جىلداردا تالشىقتى-وپتيكالىق جانە LTE (4G) جەلىلەرىن سالۋ جوسپارلانۋدا. ءبىرىنشى كەزەڭ — تالشىقتى-وپتيكالىق جەلىلەردى سالۋ. جوبانى ىسكە اسىرۋ 1 250 اۋىلدىق ەلدى مەكەندە جوعارى جىلدامدىقتى ينتەرنەت قىزمەتتەرىن ۇسىنۋعا مۇمكىندىك بەرەدى. 2019 جىلعى 1-جارتى جىلدىقتاعى جاعداي بويىنشا تالشىقتى-وپتيكالىق جەلىلەر 83 اۋىلدىق ەلدى مەكەندە ىسكە قوسىلدى. 2019 جىلدىڭ سوڭىنا دەيىن 685 اۋىل ينتەرنەت جەلىسىنە قوسىلادى. ال 2020 جىلى قالعان 509 اۋىلدى قوسۋ جوسپارلانۋدا. ەكىنشى كەزەڭ — LTE (4G) ستاندارتىنداعى ءموبيلدى جەلىلەردى دامىتۋ ارقىلى 3 143 اۋىلدى, ونىڭ ىشىندە 2019 جىلى – 574, 2020 جىلى – 1 046 جانە 2021 جىلى – 1 523 اۋىلى ينتەرنەتپەن قامتۋ جوسپارلانعان», — دەدى اسقار جۇماعاليەۆ.
ونىڭ سوزىنە قاراعاندا, اتالعان جوبالاردى ىسكە اسىرۋ اياسىندا 2020 جىلدىڭ اياعىنا دەيىن تۇرعىنداردىڭ سانى 250-دەن اساتىن 880 اۋىل كەڭ جولاقتى ينتەرنەت جەلىسىمەن قامتىلادى. سونىمەن قاتار ارى قاراي تۇرعىنداردىڭ سانى 50-دەن جوعارى 885 اۋىلدى ينتەرنەت جەلىسىنە قوسۋ جوسپارلانعان. ناتيجەسىندە 2022 جىلدىڭ سوڭىنا دەيىن 5089 اۋىلدىق ەلدى مەكەن ينتەرنەت جەلىسىنە قوسىلادى.
«ال قالعان اۋىلدارعا سپۋتنيكتىك بايلانىس ارقىلى ينتەرنەت جەلىسىن ۇيىمداستىرۋدىڭ تەحنيكالىق مۇمكىندىگى قامتاماسىز ەتىلەدى. بۇل ورايدا اۋىلدىق ەلدى مەكەندەردى ينتەرنەت جەلىسىنە قوسۋ ۇلتتىق ەكونوميكا مينيسترلىگىمەن جاسالعان پەرسپەكتيۆتى اۋىلدار تىزىمىنە سايكەس ورىندالادى», — دەدى مينيستر.
