بيىل 943 مىڭنان استام ادام جۇمىسقا ورنالاسادى

بيىل حالىقتى جۇمىسپەن قامتۋدىڭ وڭىرلىك كارتالارىن ىسكە اسىرۋ اياسىندا 943 مىڭنان استام ادام جۇمىسقا ورنالاسادى, دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگى.

«ونىڭ ىشىندە, سۋبسيديالاناتىن جۇمىس ورىندارىنا – 193,8 مىڭ, بوس جۇمىس ورىندارىنا – 318,1 مىڭ, پرەزيدەنتتىڭ «10 مىڭ تۇرعىنعا 100 جۇمىس ورنى» باستاماسى شەڭبەرىندە – 341,3 مىڭ ورىن قاراستىرىلعان. ال جاستارعا جىلدىق 2,5% جەڭىلدىكپەن شاعىن كرەديت بەرۋ شەڭبەرىندە – 5,8 مىڭ, «اۋىل اماناتى» جوباسى بويىنشا كرەديت بەرۋ شەڭبەرىندە – 15,2 مىڭ جۇمىس ورنى جوسپارلانعان «, – دەيدى مينيسترلىك.

ەلەكتروندىق ەڭبەك بيرجاسىندا حالىققا جۇمىس ورىندارى تۋرالى اقپارات بەرەتىن جانە ازاماتتاردى جۇمىسقا ورنالاستىرۋ پروتسەسىمەن قامتاماسىز ەتەتىن ارنايى فۋنكتسيونال ىسكە قوسىلدى. مۇندا جۇمىس ىزدەپ جۇرگەن كەز كەلگەن ازامات اقپارات الا الادى.

جەرگىلىكتى اتقارۋشى ورگانداردىڭ دەرەكتەرىنە سايكەس بيىلعى 1 ناۋرىزداعى جاعداي بويىنشا 143,7 مىڭ ادام, ونىڭ ىشىندە 65 مىڭعا جۋىعى تۇراقتى جۇمىسقا ورنالاستى.