ءبىلىم
بيىل قاي سالاعا قانشا گرانت ءبولىندى: قازاقستاندا سۇرانىسقا يە ماماندىقتار اتالدى
فوتو: رexels.com
عىلىم جانە جوعارى ءبىلىم مينيسترلىگى 2025-2026 وقۋ جىلىنا ارنالعان قانشا گرانت بولىنگەنىن جانە قاي سالاعا باسىمدىق بەرىلىپ, ەل ەكونوميكاسىن كوتەرۋ ءۇشىن قانداي ماماندار سۇرانىسقا يە ەكەنىن ايتتى, دەپ جازدى qandastar.kz
مينيسترلىكتىڭ مالىمەتىنشە, بيىلعى وقۋ جىلىنا بولىنەتىن گرانتتار بىلتىرعىمەن بىردەي. عىلىم جانە جوعارى ءبىلىم مينيسترلىگىنە قاراستى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى جاننا ەسينباەۆا سارالانعان گرانتتار مەن “سەرپىن” باعدارلاماسىنا دا توقتالدى.
stan.kz حابارلاعانداي, 2025-2026 وقۋ جىلىنا 77 مىڭنان استام گرانت بولىنگەن. ۆەدومستۆونىڭ مالىمەتىنشە, مەملەكەتتىك ءبىلىم بەرۋ تاپسىرىسى ەڭبەك مينيسترلىگى ۇسىنعان كادرلارعا دەگەن قاجەتتىلىكتىڭ ورتا مەرزىمدى بولجامى نەگىزىندە جاسالعان.
- باكالاۆريات – 77 مىڭنان استام گرانت;
- ماگيستراتۋرا – 10 مىڭنان استام گرانت;
- دوكتورانتۋراعا – 3 مىڭعا جۋىق گرانت.
“بىلتىر دا 78 مىڭعا جۋىق گرانت بولىنگەن ەدى. بيىل مەملەكەتتىك ءبىلىم بەرۋ تاپسىرىسى سول كولەمدە ساقتالدى. پەداگوگيكا سالاسىنا 13 مىڭنان استام, اقپاراتتىق كوممۋنيكاتسيالىق تەحنولوگيالارعا جانە ينجەنەرلىك باعىتتا 20 مىڭنان استام گرانت قاراستىرىلعان. باسقا سالالارعا قاجەتتىلىگىنە ساي ءبولىندى. بىزدىڭ ەكونوميكامىزعا بايلانىستى قازىر ينجەنەرلىك, سۋ جانە ەنەرگەتيكا, جول قۇرىلىسى, كولىك, اۋە جولدارى مەن تەمىر جول سالاسىنداعى ماماندار قاجەت. سول سەبەپتى ءدال وسى سالالارعا ءتيىستى گرانتتار ءبولىنىپ وتىر. تالاپكەرلەردىڭ اراسىندا مەديتسينالىق, پەداگوگيكالىق جانە ينجەنەرلىك باعىتتاردا, بيوتەحنولوگيا, جەڭىل ونەركاسىپ, تاۋ-كەن ىستەرى ماماندىقتارىنا سۇرانىس كوپ. بىلتىرمەن سالىستىرعاندا گرانت كولەمى ساقتالادى”, – دەدى جاننا ەسينباەۆا.
ەڭبەك مينيسترلىگىنىڭ مالىمەتىنشە, 2030 جىلعا دەيىن 800 مىڭنان استام جوعارى ءبىلىمدى ماماندار قاجەت. ونىڭ ىشىندە:
- 60%-دان استامى – ينجەنەرلىك ءبىلىمى بار ماماندار,
- 21%-ى – پەداگوگيكالىق ءبىلىمى بار ماماندار.
ال سارالانعان گرانتتار بيىل ەكى دايىندىق باعىتىنا بەرىلىپ وتىر. ول پەداگوگيكالىق جانە الەۋمەتتىك عىلىمدار سالاسىنا ءبولىندى.
“بىلتىرعىداي 300 گرانت قاراستىرىلدى. ياعني, بىلتىرعى پيلوتتىق جوبا بيىل جالعاسادى. سارالانعان گرانتتىڭ نەگىزگى ەرەكشەلىگى – نەگىزگى كونكۋرس كەزىندە گرانت الا الماعان, بىراق ۇلتتىق بىرىڭعاي تەستتەن جوعارى بالل العان تالاپكەرلەرگە گرانتقا تۇسۋگە مۇمكىندى بەرەدى. بيىل سارالانعان گرانت بايقاۋى نەگىزگى بايقاۋدان بولەك وتكىزىلەدى. ياعني, نەگىزگى, جەرگىلىكتى اتقارۋشى ورگانداردىڭ, جۇمىس بەرۋشىلەر تاراپىنان بەرىلەتىن جانە “قازاقستان حالقىنا” قورىنان بەرىلەتىن گرانتتار كونكۋرسى اياقتالعان سوڭ, سارالانعان گرانتتار بايقاۋى وتەدى. سارالانعان گرانتتىڭ قۇنى – 500 مىڭ تەڭگەدان باستالادى. مەملەكەت تاراپىنان 500 مىڭ تەڭگە تولەنەدى, ال قالعان جارتىسىن تالاپكەردىڭ ءوزى نەمەسە باسقا دە دەمەۋشىلىك قارجى ەسەبىنەن تولەۋ مۇمكىندىگى قاراستىرىلعان. سارالانعان گرانتقا ەشقانداي قۇجات تاپسىرۋدىڭ قاجەتى جوق. نەگىزگى گرانتتار كونكۋرسى شىلدەنىڭ 13-20 اراسىندا وتەدى, ياعني ءبىر اپتا بويى قۇجاتار قابىلدانادى. سول تاپسىرىلعان قۇجات جەتىلىكتى, ول سارالانعان گرانتتار كونكۋرسىنا جارامدى. كونۋرس بازادا ساقتالعان تالاپكەرلەر اراسىندا جۇرگىزىلەدى”, – دەدى ۆەدومستۆو وكىلى.
بيىل “سەرپىن” باعدارلاماسىنا 2 مىڭنان استام گرانت قاراستىرىلعان. ايتا كەتەيىك, ستاندارتتى گرانت بويىنشا جۇمىس وتەۋ مەرزىمى 3 جىل بولسا, “سەرپىن” باعدارلاماسىمەن وقىعان ستۋدەنتتەر ءۇشىن 2 جىل.
سونداي-اق 2025-2026 وقۋ جىلىندا مەملەكەت “ينجەنەرلىك, وڭدەۋ, قۇرىلىس» سالاسىنا باسىمدىق بەرىپ, 18 946 گرانت بولگەن. ال پەداگوگتەردى دايىنداۋعا 13 226 گرانتقا تاپسىرىس بەرىلدى.
“اقپاراتتىق-كوممۋنيكاتسيالىق تەحنولوگيالار” – 11 585;
“جاراتىلىستانۋ عىلىمدارى, ماتەماتيكا جانە ستاتيستيكا” – 9 188;
“اۋىل شارۋاشىلىعى جانە بيورەسۋرستار” – 2 379;
“قىزمەت كورسەتۋ” – 2 200;
“ونەر جانە گۋمانيتارلىق عىلىمدار” – 1915;
“الەۋمەتتىك عىلىمدار, جۋرناليستيكا جانە اقپارات” – 1485;
“بيزنەس, باسقارۋ جانە قۇقىق” – 1423;
“ۆەتەريناريا” – 1 275.
بۇعان دەيىنساياسات نۇربەك مەملەكەت پەن مينيسترلىك پەداگوگيكالىق ماماندىقتار ءۇشىن بەلگىلەنگەن ورتاق شەكتى بالدى وزگەرتپەۋگە ۋادە بەرگەن ەدى.
