جاڭالىقتار
بيىل «كاسپي» بيرجاسىندا 26 مىڭ توننادان استام بيتۋم ساتىلدى
فوتو: جەكە قورىنان
«كاسپي» تاۋار بيرجاسى» اق 2025 جىلدىڭ ءبىرىنشى جارتىجىلىنداعى بيتۋمنىڭ بيرجالىق ساۋدا-ساتتىق ناتيجەلەرىن ۇسىندى. جاريالانعان تالداۋ بايانداماسىنا سايكەس, بۇل كەزەڭدە «كاسپي» بيرجا الاڭىندا جالپى سوماسى 1 317 ملن تەڭگەگە جالپى كولەمى 26 365 توننا بولاتىن 45 مامىلە جاسالدى, دەپ جازدى qandastar.kz
بيتۋم – بۇل مۇنايدى وڭدەۋ ناتيجەسىندە الىناتىن جوعارى تۇتقىر مۇناي ءونىمى. ول اۆتوموبيل جولدارىن, ۇشۋ-قونۋ جولاقتارىن, گيدرووقشاۋلاعىش جۇيەلەردى جانە باسقا دا ينفراقۇرىلىمدىق نىسانداردى سالۋ مەن جوندەۋدە كەڭىنەن قولدانىلادى.
جاسالعان مامىلەلەر بويىنشا ورتاشا باعالار تونناسىنا 149 000 تەڭگەدەن 152 000 تەڭگەگە دەيىنگى دياپازوندا بولدى.
ساۋدا-ساتتىق 15% بيرجالىق قامتاماسىز ەتۋمەن قوسارلانعان قارسى اۋكتسيون فورماتىندا وتكىزىلىپ جاتىر, بۇل رەتتە باعا بازالىق باعادان 101%-دان اسپاۋى ءتيىس, بۇل ءادىل جانە باسەكەلەستىك باعا بەلگىلەۋدى قامتاماسىز ەتەدى.
اتالعان كەزەڭدەگى ساۋدا-ساتتىققا بەلگىلەنگەن تالاپتارعا سايكەس قاتىسۋعا جىبەرىلگەن 9 ساتىپ الۋشى كومپانيا جانە 2 ساتۋشى قاتىستى.
قازاقستاندا بيتۋمعا سۇرانىس ارقاشان جوعارى, اسىرەسە جول جانە قۇرىلىس جۇمىستارى جانداناتىن كوكتەم-جاز كەزەڭىندە تۇراقتى تۇردە جوعارى.
ساۋدا-ساتتىق ناتيجەلەرى «كاسپي» تاۋار بيرجاسىنىڭ ساراپشىلارى دايىنداعان قازاقستانداعى بيتۋم نارىعى بويىنشا تالداۋ بايانداماسىنا ەنگىزىلدى. قۇجاتتا سونىمەن قاتار:
– بيتۋم ءوندىرۋ جانە تۇتىنۋ ديناميكاسىنا شولۋ;
– لوگيستيكالىق جانە ينفراقۇرىلىمدىق شەكتەۋلەردى تالداۋ;
– يمپورت جانە ەكسپورت تۋرالى دەرەكتەر;
– بيرجالىق ساۋدانىڭ نارىقتىق باعانى قالىپتاستىرۋعا اسەرىن باعالاۋ;
– جەتكىزۋ جۇيەسىنىڭ وتىمدىلىگى مەن تيىمدىلىگىن ارتتىرۋ بويىنشا ۇسىنىستار.
ەسەپتىڭ تولىق نۇسقاسى بيرجانىڭ رەسمي سايتىندا قولجەتىمدى: https://ccx.kz/analytical-report-bitumen-market
2021 جىلى قازاقستانداعى مۇناي بيتۋمى تاۋار بيرجالارى ارقىلى مىندەتتى تۇردە وتكىزۋگە جاتاتىن تاۋاردىڭ ەڭ از ۇلەسى بار بيرجالىق تاۋارلار تىزبەسىنە جانە بيىلعى وندىرىستىك جىلعا ىشكى نارىققا جەتكىزۋگە جوسپارلاناتىن بيتۋمنىڭ جالپى جىلدىق كولەمىنىڭ 10% مولشەرىندە كورسەتىلگەن مىندەتتەمە قولدانىلاتىن سۋبەكتىلەر ساناتىنا ەنگىزىلگەنىن ايتا كەتەيىك.
مىندەتتەمە بيتۋم وندىرۋشىلەرگە, وعان مەنشىك قۇقىعىمەن تيەسىلى كومىرسۋتەك شيكىزاتىنان وندىرىلگەن بيتۋم يەلەرىنە قولدانىلادى. بيتۋمدى بيرجادا قۇرىلىس جۇمىستارىن جۇرگىزەتىن مەردىگەر ۇيىمدار عانا ساتىپ الا الادى.
جولعا ارنالعان بيتۋم ساتىپ الۋشىلاردىڭ تىزبەسى اۆتوموبيل جولدارىن سالۋ جانە جوندەۋ سالاسىندا باسشىلىقتى جۇزەگە اسىراتىن مەملەكەتتىك ورگاننىڭ رەسمي ينتەرنەت-رەسۋرسىندا ورنالاستىرىلادى.
بيرجالىق ساۋدا قۇرالى مەردىگەرلىك ۇيىمداردىڭ بيتۋم وندىرۋشىلەردەن تىكەلەي بيتۋم ساتىپ الۋ مۇمكىندىگىن قامتاماسىز ەتۋ جانە ساۋدا-ساتتىقتا قالىپتاسقان نارىقتىق باعانى انىقتاۋ ماقساتىندا ەنگىزىلدى.
بيرجالىق ساۋدا-ساتتىق 2022 جىلى توقتاتىلىپ, 2023 جىلدىڭ ناۋرىزىنان باستاپ قايتا جاندانعان بولاتىن.
ايتا كەتەيىك, «كاسپي» تاۋار بيرجاسى» اق – مۇناي ونىمدەرىن, كومىردى جانە تسەمەنتتى قوسا العاندا, تاۋارلاردىڭ كەڭ سپەكترىمەن ساۋدا جاساۋعا ماماندانعان قازاقستاننىڭ جەتەكشى بيرجالىق الاڭى. «كاسپي» تاۋار بيرجاسى» اق ەنەرگەتيكالىق بيرجالاردىڭ ەۋروپالىق قاۋىمداستىعىنا (EUROPEX) قاۋىمداستىرىلعان مۇشە رەتىندە كىرەدى. S&P Global حالىقارالىق رەيتينگ اگەنتتىگىنىڭ ەڭ جوعارى ESG-باعاسىنا يە.
بۇۇ جاھاندىق شارتىنىڭ تولىققاندى قاتىسۋشىسى بولعان تمد اۋماعىنداعى العاشقى بيرجالىق الاڭ سانالادى. سونداي-اق, «كاسپي» – KASE قازاقستان قور بيرجاسىنىڭ رەسمي ليستينگىنە ەنگىزىلگەن ەلدەگى جالعىز تاۋار بيرجاسى.
