ءبىلىم
بيىل وقۋشىلار مەن ستۋدەنتتەر ءۇشىن وقۋ جىلى كەش باستالۋى مۇمكىن
فوتو: اشىق دەرەككوز
استانا قالاسىنىڭ وقۋشىلارى مەن ستۋدەنتتەرى ءۇشىن وقۋ جىلىنىڭ باستالۋ ۋاقىتى V دۇنيەجۇزىلىك كوشپەندىلەر ويىندارىنىڭ وتكىزىلۋىنە بايلانىستى شەگەرىلۋى مۇمكىن, دەپ حابارلايدى KYN.KZ اقپارات اگەنتتىگى sadaqmedia.kz سايتىنا سىلتەمە جاساپ.
ۆيتسە-مينيستر سەرىك جاراسباەۆتىڭ ايتۋىنشا, قازىر وقۋ-اعارتۋ مينيسترلىگىمەن جانە عىلىم جانە جوعارى ءبىلىم مينيسترلىگىمەن كەلىسسوزدەر جۇرگىزىلۋدە.
«بۇل ارادا ەكى نۇسقا بار: ءبىز نە قابانباي باتىر جانە تۇران داڭعىلدارىنداعى مەكتەپتەردى ونلاين وقىتۋ فورماتىنا اۋىستىرامىز نەمەسە وقۋ كەزەڭىنىڭ باستالۋ ۋاقىتىن استانا بويىنشا شەگەرىمىز. ءبىز ماسەلەنى قازىر قىزۋ تالقىلاپ جاتىرمىز, كەلەسى اپتادا ناقتى شەشىم قابىلداۋىمىز كەرەك», – دەدى سەرىك جاراسباەۆ.
دۇنيەجۇزىلىك كوشپەندىلەر ويىندارىن وتكىزۋ كەزىندە كولىك قوزعالىسى كەپتەلىسى بولماس ءۇشىن سپورت نىساندارىنا ارنايى شاتتل اۆتوبۋستار قاتىنايتىن بولادى.
سونىمەن قاتار, جارىستىڭ باستالۋ ۋاقىتى تاڭعى 9:00-دەن 11:00-گە اۋىستىرىلدى. V دۇنيەجۇزىلىك كوشپەندىلەر ويىندارى استانادا 8-13 قىركۇيەك ارالىعىندا وتەدى. بۇل — ەتنيكالىق سپورت تۇرلەرى بويىنشا ەڭ ءىرى حالىقارالىق سپورت جارىسى.
