بيىل ۇلتتىق قوردان 304 815 ازامات اقشا الادى

2024 جىلدىڭ بەس ايىندا بجزق «ۇلتتىق قور – بالالارعا» باعدارلاماسى بويىنشا 12 921 ءوتىنىشتى ورىنداعان. بارلىعى شامامەن 1,3 ميلليون دوللار تولەندى.

2024 جىلى قازاقستاندا «ۇلتتىق قور – بالالارعا» باعدارلاماسى ىسكە قوسىلدى, ونىڭ اياسىندا قازاقستانداعى بارلىق كامەلەتكە تولماعاندار جىل سايىن ەلىمىزدىڭ ۇلتتىق قورىنان تۇسكەن ينۆەستيتسيالىق كىرىستىڭ ءبىر بولىگىن الىپ وتىرادى.

ازىرگە قازاقستاندىق بالالاردىڭ ەسەپشوتىندا اقپان ايىندا تۇسكەن $100,52 بار. بۇل سوما جىل سايىن وسەدى جانە ونى بالا 18 جاسقا تولعاننان كەيىن عانا الۋعا بولادى. بيىل بۇل اقشانى 304 815 ازامات الادى.

بىرىڭعاي جيناقتاۋشى زەينەتاقى قورىنىڭ (بجزق) دەرەكتەرى بويىنشا, اعىمداعى جىلدىڭ 1 شىلدەسىنە دەيىن 12 921 ادام اقشاسىن الىپ ۇلگەرگەن, ال تولەمدەردىڭ جالپى سوماسى شامامەن 1,3 ميلليون دوللار بولعان: تۇرعىن ءۇي جاعدايلارىن جاقسارتۋ ماقساتىندا – 6842 ءوتىنىم (شامامەن 686 مىڭ دوللار); وقۋ اقىسىن تولەۋگە – 6 079 ءوتىنىش (شامامەن 610 مىڭ دوللار).

ءبىر ايتا كەتەرلىگى, ازاماتتاردىڭ بارلىعى اقشاسىن پايدالانباعان. وسىلايشا, جالپى سوماسى 61,5 مىڭ دوللاردان اساتىن 616 «تۇرعىن ءۇي» ءوتىنىشى بجزق-عا قايتارىلدى. وقۋ اقىسىن الۋعا تاعى 716 ءوتىنىش قايتارىلدى: مۇندا سوما 71 مىڭ دوللاردان استام بولدى.