Bıyl Ulttyq qordan 304 815 azamat aqsha alady

2024 jyldyń bes aıynda BJZQ «Ulttyq qor – balalarǵa» baǵdarlamasy boıynsha 12 921 ótinishti oryndaǵan. Barlyǵy shamamen 1,3 mıllıon dollar tólendi.

2024 jyly Qazaqstanda «Ulttyq qor – balalarǵa» baǵdarlamasy iske qosyldy, onyń aıasynda Qazaqstandaǵy barlyq kámeletke tolmaǵandar jyl saıyn elimizdiń Ulttyq qorynan túsken ınvestıııalyq kiristiń bir bóligin alyp otyrady.

Ázirge qazaqstandyq balalardyń esepshotynda aqpan aıynda túsken $100,52 bar. Bul soma jyl saıyn ósedi jáne ony bala 18 jasqa tolǵannan keıin ǵana alýǵa bolady. Bıyl bul aqshany 304 815 azamat alady.

Biryńǵaı jınaqtaýshy zeınetaqy qorynyń (BJZQ) derekteri boıynsha, aǵymdaǵy jyldyń 1 shildesine deıin 12 921 adam aqshasyn alyp úlgergen, al tólemderdiń jalpy somasy shamamen 1,3 mıllıon dollar bolǵan: Turǵyn úı jaǵdaılaryn jaqsartý maqsatynda – 6842 ótinim (shamamen 686 myń dollar); oqý aqysyn tóleýge – 6 079 ótinish (shamamen 610 myń dollar).

Bir aıta keterligi, azamattardyń barlyǵy aqshasyn paıdalanbaǵan. Osylaısha, jalpy somasy 61,5 myń dollardan asatyn 616 «turǵyn úı» ótinishi BJZQ-ǵa qaıtaryldy. Oqý aqysyn alýǵa taǵy 716 ótinish qaıtaryldy: munda soma 71 myń dollardan astam boldy.