قارجى جانە تولەمدەر
بيىلدان باستاپ ءار بالاعا 235 مىڭ تەڭگەدەن بەرىلمەك
فوتو: اشىق دەرەككوز
پرەزيدەنت «قر كەيبىر زاڭنامالىق اكتىلەرىنە مەملەكەتتىك ءبىلىم بەرۋ جيناقتاۋ جۇيەسى, اقپارات, قوعامدىق دامۋ, مادەنيەت جانە ارحيۆ ءىسى سالالارىندا ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويدى, دەپ جازدى qandastar.kz
اقوردانىڭ حابارلاۋىنشا, بۇل زاڭنامالىق تۇزەتۋلەردىڭ ءبىر بولىگى «كەلەشەك» بىرىڭعاي ەرىكتى جيناقتاۋ جۇيەسىن ەنگىزۋ ماقساتىندا ازىرلەنگەن. بۇل يگىلىكتى پايدالانۋ ءۇشىن بالانىڭ جاسى 5 جاستان اسۋعا ءتيىس.
سوندا وعان مەملەكەتتەن باستاپقى ءبىلىم بەرۋ كاپيتالى بەرىلەدى. وعان جىل سايىن مەملەكەتتىك سىيلىقاقى جانە بانكتىك دەپوزيتتىك پايىزدار تولەنەدى.
«بىرجولعى باستاپقى ءبىلىم بەرۋ كاپيتالى 2025 جىلى جانە ودان كەيىنگى جىلدارى 5 جاسقا تولعان بالالارعا تولەنەدى. ونىڭ مولشەرى عىلىم جانە جوعارى ءبىلىم مينيسترلىگى بەكىتەتىن «باستاپقى ءبىلىم بەرۋ كاپيتالىن ەسەپتەۋ, پايدالانۋ جانە قايتارۋ قاعيدالارىنا» ساي ەسەپتەلەدى. «كەلەشەك» جۇيەسى جىل سايىن 5% مەملەكەتتىك سىيلىقاقى, ال, حالىقتىڭ الەۋمەتتىك وسال توپتارىنىڭ بالالارى ءۇشىن 7% مەملەكەتتىك سىيلىقاقى كوزدەلگەن قولدانىستاعى مەملەكەتتىك ءبىلىم بەرۋ جيناقتاۋ جۇيەسىمەن بىرگە بالاڭىزدىڭ بولاشاعى ءۇشىن قاراجات جيناۋعا مۇمكىندىك بەرەدى», – دەپ مالىمدەدى اقوردا.
بۇل رەتتە «كەلەشەك» باعدارلاماسىنىڭ قارجىسىن تەحنيكالىق جانە كاسىپتىك ءبىلىم الۋعا, ورتا مەكتەپ بىتىرگەننەن كەيىن جوعارى ءبىلىم الۋعا جانە جوعارى وقۋ ورنىنان كەيىن ءبىلىمىن جەتىلدىرۋگە باعىتتاۋعا بولادى.
ەگەر كامەلەت جاسقا تولعان دارىن كوللەدجگە نەمەسە ۋنيۆەرسيتەتكە, ودان سوڭ ماگيستراتۋرا نە دوكتورانتۋراعا گرانتپەن ءتۇسىپ, وسىنىڭ ءبارىن تەگىن السا, وندا «كەلەشەكتىڭ» قاراجاتىن تۇرعىن ءۇي جاعدايىن جاقسارتۋعا, پاتەر ساتىپ الۋعا جۇمساۋىنا رۇقسات ەتىلەدى.
باسپانا كەرەك بولماسا, سالىمىن ءارى قاراي جيناقتاۋدى جالعاستىرۋىنا نەمەسە باسقا بالاعا, تۋىسقانىنا سىيلاۋىنا بولادى.
عىلىم جانە جوعارى ءبىلىم ءمينيسترىنىڭ ورىنباسارى تالعات ەشەنقۇلوۆ باعدارلاما اياسىندا بالالاردىڭ قانشا الاتىنىن ءتۇسىندىردى.
«وسى «كەلەشەك» بىرىڭعاي جيناقتاۋ جۇيەسىنىڭ تالاپتارىنا سايكەس, مىسالى, جەتىم جانە اتا-اناسىنىڭ قامقورلىعىنسىز قالعان بالالار ءۇشىن «باستاپقى ءبىلىم بەرۋ كاپيتالىنىڭ» كولەمى, باسقا ساناتتاعى بالالارعا قاراعاندا ەكى ەسە كوپ بولادى. اتاپ ايتقاندا, قازاقستانداعى جاسى 5-تەن اسقان بارلىق بالاعا 60 ايلىق ەسەپتىك كورسەتكىش بولىنەدى. بۇل 2025 جىلى 235 920 تەڭگەگە تەڭ. ال, اتالعان ساناتتاعى بالالار ءۇشىن باستاپقى كاپيتال 120 اەك بولادى. بيىل بۇل 471 840 تەڭگەنى قۇرايدى», – دەدى ۆيتسە-مينيستر ەشەنقۇلوۆ.
«كەلەشەك» اياسىندا بالالاردىڭ اتا-انالارىمەن شارت بەكىتىلەدى. دەگەنمەن, ءمينيستردىڭ ورىنباسارىنىڭ ايتۋىنشا, كەلىسىمشارتقا قول قويۋ قۇقىعى جەتىمدەر ءۇيىنىڭ باسشىسىنا بەرىلۋى مۇمكىن.
ء«دال ارنايى شوت اشىلعان مەزەتتە زاڭدى تۇلعا رەتىندە تىركەلگەن ازاماتتىڭ وسى كەلىسىمشارتقا قول قويۋ قۇقىعى بار. بالالار ءۇيىنىڭ باسشىسى قول قويا الادى. ەگەر بالانى 5 جاسقا تولماي تۇرىپ, اسىراپ السا, وندا بالا ءۇشىن كەلىسىمشارت بەكىتۋ قۇقىعى اسىراپ الۋشى اكە-شەشەسىنە وتەدى. ەگەر قول قويىلىپ قويسا, وسى قۇقىقتاردىڭ نەگىزىندە اسىراپ الۋشى اتا-انامەن ارادا كەلىسىمشارت قايتا جاسالىپ, سول كەلىسىمشارتتاعى تالاپتار ورىندالادى», – دەدى تالعات ەشەنقۇلوۆ.
ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى قۇدايبەرگەن بەكسۇلتانوۆتىڭ تۇسىندىرۋىنشە, «كەلەشەك» اياسىندا بالاسىنا مەملەكەتتەن باستاپقى ءبىلىم بەرۋ كاپيتالىن الۋ ءۇشىن اتا-انالار باعدارلاماعا قاتىساتىن بانكتە شوت اشىپ, وعان وزدەرى دە اقشا سالىپ تۇرۋعا مىندەتتى بولادى. ەگەر قاتىسپاسا, ەڭ تومەنگى جارنانى ەنگىزبەسە, مەملەكەتتىك كاپيتالدى دا الا المايدى.
«بۇل زاڭ اياسىندا «كەلەشەك» اتتى بىرىڭعاي ەرىكتى جيناقتاۋ جۇيەسى ەنگىزىلەدى. «كەلەشەككە» سايكەس, اتا-انالار مەملەكەتتىك ءبىلىم بەرۋ جيناقتاۋ جۇيەسىنە قاتىسۋشى بانكتە شوت اشۋى قاجەت. مەملەكەت ءوز كەزەگىندە ول شوتقا بىرجولعى باستاپقى كاپيتالدى قۇيادى. ول ءاربىر جىلدا 5 جاسقا تولعان بالالاردىڭ شوتىنا جىبەرىلەتىن بولادى. جەتىم جانە تاستاندى بالالار ءۇشىن مەملەكەت 120 اەك-تەن, باسقا بارلىق بالالارعا – 60 اەك-تەن بەرەدى. بۇل – ءبىر. ەكىنشىدەن, اتا-انالار جىل سايىن ەڭ قۇرىعاندا, «ەڭ تومەن جارنالاردى» تولەۋى كەرەك», – دەدى ماجىلىسمەن.
ونىڭ ايتۋىنشا, اتا-انالاردان ءوز بالاسىنىڭ شوتىنا جىل سايىن سالىپ تۇرۋى تالاپ ەتىلەتىن ەڭ تومەنگى جارنا:
- حالىقتىڭ الەۋمەتتىك وسال توبى ساناتىنداعى بالالار ءۇشىن 12 اەك-ءتى (2025 جىلى – 47 184 تەڭگەنى),
- باسقا بارلىق بالالار ءۇشىن 24 اەك-ءتى (بيىل 94 368 تەڭگەنى) قۇرايدى.
ۇشىنشىدەن, ۇكىمەت جىل سايىن وسى جيناقتارعا بارلىق بالالار ءۇشىن 5%, حالىقتىڭ الەۋمەتتىك وسال توبى ساناتىنداعى بالالار ءۇشىن 7% مولشەرىندە مەملەكەتتىك سىيلىقاقى قوسادى.
تورتىنشىدەن, باعدارلاماعا قاتىسۋشى بانكتەر ءتول دەپوزيت مولشەرلەمەسى بويىنشا «كەلەشەك» سالىمدارىنا دەپوزيتتىك اقشا سىيلىقاقىسىن تولەيدى.
قورىتا ايتقاندا, مەملەكەت ءاربىر بالاعا ومىرىندە 1 رەت قانا بەرەتىن بىرجولعى باستاپقى كاپيتالعا جانە اتا-انالاردىڭ وزدەرى بالاسى ءۇشىن ءدال سول شوتتا جىل سايىن جينايتىن جيناعىنا بىرىنشىدەن مەملەكەتتىك پرەميا بەرىلەدى (5 نە 7 پايىز). ەكىنشىدەن, ولارعا بانكتەر دەپوزيتتىك سىياقى ەسەپتەيدى. ونىڭ كولەمى بانككە بايلانىستى بولادى.
اقىر سوڭىندا جيناقتالعان قاراجاتتى بالانىڭ كوللەدجدەگى وقۋىنا, ۋنيۆەرسيتەتكە اقىلى تۇسۋىنە جۇمسالۋى قاجەت. بۇل جەردە دەپۋتاتتاردىڭ ايتۋىنشا, زاڭ بويىنشا قاراجاتتى شەتەلدە وقۋعا دا پايدالانۋعا بولادى.
ەگەر بالا ءبىلىم بەرۋ گرانتىمەن تەگىن تۇسسە, جيناقتارىن تۇرعىن ءۇي ساتىپ الۋعا نەمەسە باسقا دەڭگەيدە ءبىلىم الۋ, ەكىنشى ماماندىعىن يگەرۋ ءۇشىن پايدالانۋعا مۇمكىندىك بەرىلەدى.
بۇدان بولەك, قاراجاتتى ءۇشىنشى تۇلعانىڭ – تۋعان اعا-ىنىلەرىنىڭ, اپكە-سىڭلىلەرىنىڭ ۇقساس سالىمىنا نەمەسە ساقتاندىرۋ كومپانياسىنىڭ شارتىنا اۋدارۋعا بولادى.
زاڭ بويىنشا «كەلەشەك» قولدانىستاعى «AQYL مەملەكەتتىك ءبىلىم بەرۋ جيناقتاۋ جۇيەسىندە» جۇمىس ىستەيتىن بولادى. سونى اۋىستىرادى.
