ء«بىز ەشكىمنىڭ وتارى ەمەسپىز!». وزبەكتەر لاۆروۆقا قارىمتا قايتاردى

وزبەك شەنەۋنىكتەرى وزبەك ەلىندە ورناتىلعان ەسكەرتكىشتە ورىسشا جازۋ جوق دەپ «رەنجىگەن» رەسەيدىڭ سىرتقى ىستەر ءمينيسترى سەرگەي لاۆروۆقا جاۋاپ قاتتى, دەپ حابارلايدى qandastar.kz Dalanews.kz-كە سىلتەمە جاساپ.

سەرگەي لاۆروۆ سامارقاندقا ەكى كۇندىك رەسمي ساپارمەن بارعان بولاتىن. ساپار بارىسىندا وزبەكستان پرەزيدەنتى شاۆكات ميرزيوەۆپەن كەزدەسۋ جانە باحتيور سايدوۆپەن كەلىسسوزدەر وتكىزۋ جوسپارلانعان.

23 ءساۋىر كۇنى رەسەيدىڭ سىرتقى ىستەر ءمينيسترى سەرگەي لاۆروۆ سامارقاندقا جاساعان ساپارى بارىسىندا «قايعىلى جامىلعان انا» مەموريالىنىڭ جانىندا ورىس تىلىندەگى جازۋدىڭ بولماۋىنا نازار اۋدارعان.

ەسكەرتكىشتىڭ ەكى جاعىندا جازۋلار بار – ءبىرى وزبەك تىلىندە, ەكىنشىسى اعىلشىن تىلىندە. رەسەي ءسىم باسشىسى ەسكەرتكىشتە قازا تاپقان جاۋىنگەرلەرگە ارنالعان سوزدەر تەك اعىلشىن تىلىنە اۋدارىلعانىن ايتتى. وندا: «You are always in our heart, my dear» («سەن ارقاشان ءبىزدىڭ جۇرەگىمىزدەسىڭ, قىمباتتىم») دەپ جازىلعان.

فوتو: haqqin.az

– سىزدەرگە اعىلشىندار قايدان كەلىپ ءجۇر? مىناۋ اعىلشىن تىلىندە جازىلعان ەكەن, – دەدى ول ەكسكۋرسوۆودقا قاراپ.
– مۇندا بارلىق تىلدە جازىلعان نەگىزى. بۇل – تۋريستىك قالاسى عوي, – دەپ جاۋاپ بەردى ول.
– ورىسشاسىن كورىپ تۇرعان جوقپىن, – دەپ جاۋاپ قاتتى مينيستر.

اڭگىمە بارىسىندا وزبەكستاننىڭ سىرتقى ىستەر ءمينيسترى باحتيور سايدوۆ تا قاسىندا بولدى.

كەلىسسوزدەر اياسىندا تاراپتار ەكىجاقتى قارىم-قاتىناستاردى دامىتۋ, ەۋرازيالىق ينتەگراتسيا جانە ەكىنشى دۇنيەجۇزىلىك سوعىستاعى جەڭىستىڭ 80 جىلدىعىنا دايىندىق ماسەلەلەرىن تالقىلاعان بولاتىن.

كەيىنىرەك وزبەكستان پرەزيدەنتى شاۆكات ميرزيوەۆپەن جانە سىرتقى ىستەر ءمينيسترى باحتيور سايدوۆپەن وتكەن كەلىسسوزدەردىڭ قورىتىندىسى بويىنشا وتكەن بريفينگتە سەرگەي لاۆروۆ وزبەكستاندا «ورىس ءتىلىنىڭ پوزيتسياسىن نىعايتۋعا» باعىتتالعان كۇش-جىگەرگە قولداۋ ءبىلدىردى.

ول وزبەكستاندا كۇندەلىكتى ومىردە ورىس ءتىلىن بەلسەندى قولداناتىن شامامەن ءبىر ميلليون وتانداستىڭ تۇراتىنىن اتاپ ءوتتى.

«رەسەي وزبەكستان باسشىلىعىنىڭ, اتاپ ايتقاندا شاۆكات ميرومون ۇلى ميرزيوەۆتىڭ, ۇلتارالىق ۇيلەسىمدى ساقتاۋ جانە ورىس ءتىلىنىڭ پوزيتسياسىن نىعايتۋ جولىنداعى كۇش-جىگەرىن ۇنەمى قولدايدى. بۇل ءتىل وزبەكستاندا ۇلتارالىق قاتىناس ءتىلى رەتىندە, سونداي-اق رەسەيلىك مادەني جانە تاريحي مۇرانىڭ ءبىر بولشەگى رەتىندە قىزمەت ەتىپ كەلەدى», – دەدى لاۆروۆ.

وزبەك شەنەۋنىكتەرىنىڭ جاۋابى

رەسەيدىڭ سىرتقى ىستەر مينيسترىنە وزبەكستان ولي ءماجىلىسىنىڭ زاڭ شىعارۋ پالاتاسىنىڭ دەپۋتاتى وديلجون توجيەۆ جاۋاپ بەردى. دەپۋتات رەسەيلىك ساياساتكەرگە قىسقا, بىراق نىق جاۋاپ قايتاردى.

«وزبەك حالقى ءتىلدى مىندەت ەمەس, مۇمكىندىك رەتىندە تاڭدايدى. شەتەل ءتىلىن جاساندى تۇردە ناسيحاتتاۋ – سۇيىسپەنشىلىك ەمەس, كەرىسىنشە, قارسىلىق تۋدىرادى. ەگەر ماسكەۋدىڭ باستى الاڭىندا وزبەك تىلىندە جازۋ پايدا بولسا, وندا بۇل تۋرالى ويلانۋعا بولادى», – دەپ جازدى دەپۋتات.

parliament.gov.uz

سونىمەن قاتار, «ميللي تيكلانيش» پارتياسىنىڭ جەتەكشىسى اليشەر قادىروۆ رەسەي سىرتقى ىستەر ءمينيسترى سەرگەي لاۆروۆتىڭ وزبەكستانداعى ورىس ءتىلىنىڭ مارتەبەسىنە قاتىستى سوزدەرىنە ءوز ۇستانىمىن ءبىلدىردى.

«رەسەيلىك ساياساتكەرلەر وزبەكستاندا ورىس ءتىلى مەن مادەنيەتىنە دەگەن كوزقاراستى كەز كەلگەن جولمەن ناشارلاتۋعا تىرىسىپ جاتىر. نەگە ءبىزدىڭ جاستار ەشكىم ماجبۇرلەمەسە دە اعىلشىن, نەمىس, تۇرىك جانە اراب تىلدەرىن ۇيرەنۋگە ۇمتىلادى? مينيستر لاۆروۆ كۇشپەن تالاپ ەتىلگەن قۇرمەت پەن جالعان قاجەتتىلىك كەرى اسەرگە اكەلەتىنىن جاقسى تۇسىنەدى», – دەپ جازدى قادىروۆ Telegram پاراقشاسىندا.

podrobno.uz

سەرگەي لاۆروۆتىڭ سوزىنە جۋرناليستيكا جانە بۇقارالىق كوممۋنيكاتسيا ۋنيۆەرسيتەتىنىڭ رەكتورى شەرزودحون كۋدراتحوجا دا پىكىر ءبىلدىردى.

stv.uz

ول ءار ەلدىڭ ەسكەرتكىشتەر مەن تاقتايشالاردا قاي تىلدە جازۋ جازاتىنىن ءوزى شەشۋگە قۇقىلى ەكەنىن ايتتى.

«ءبىر مەملەكەتتىڭ ءمينيسترى كەلىپ, ءبىزدىڭ ىشكى شەشىمدەرىمىزدى سىناۋى – دۇرىس ەمەس. ءبىز ەشكىمنىڭ وتارى ەمەسپىز!» – دەدى رەكتور.