«Biz nege baı emespiz»: Depozıtke aqsha jınap júrgen 5 jasar balanyń áreketi kópshilikti súısindirdi

Áleýmettik jelide súndetke otyrǵyzylǵan 5 jastaǵy Baqdáýlettiń vıdeosy qazaqstandyqtardy súısindirdi. Onda ol kórimdik retinde jınalǵan aqshaǵa oıynshyq satyp alýdyń ornyna ony depozıtke jınaıtynyn aıtady, dep habarlaıdy Skifnews.kz aqparat portaly qandastar.kz-ke silteme jasap.

Qazaqstandyqtyrdy aqylymen súısindergen Baqdáýlet vıdeosynda kórimdikke berilgen 300 myń teńgeni qaıda jumsaıtynyn aıtady. Onyń bul áreketinen aqshany basqara alatynyn baıqaýǵa bolady.

«Dostar, mynaý – meniń súndettelgennen keıin tapqan aqsham. “Ápshý” kesip, alǵashqy 300 myń teńgeni depozıtke salǵaly jatyrmyz. Muny erteń mamam depozıtke jınaımyn dedi. Búgin be, erteń be bilmeımin. Bul aqshaǵa keremet úı alamyn. Kóligimen qosyp, satyp alamyn. Negizinde bul aqshaǵa oıynshyq alamyn dep oılap júrdim. Biraq oıynshyq alýdan bas tarttym. Oıynshyq kerek emes, synyp qalady. Osy aqshadan biz baıyp keteıik. MrBeast sııaqty aqshamyz kóp bolsyn», – deıdi bala vıdeoda.

Jeli qoldanýshylary balanyń qylyǵyna tańdanyp, jyly tilekterin jarysa jazdy.

«Bolar bala boǵynan» dep beker aıtpaǵan atam qazaq», «Bala bala kezinde dúnıemen emes, oıynshyqpen oılaýy kerek. Úlkeıgende basqasyna bas qatyrýǵa úlgeredi», «Bolashaq mıllıoner», «Osy aqshań kóbeıip degenińe, armanyńa jet batyrym. Aqylyńnan sol…», «Sol aıtyp júrgen jurttyń balasy», «Jastaıynan qarjylaı saýatty degen osy. Depozıt degen tátti tilinen. Kóz tımesin», – dedi oqyrmandar.

Baqdáýlettiń depozıtke aqsha jınaý týraly qaıdan bilgenin anasy Madına Kúzembaıdan suradyq. Onyń aıtýynsha, úlken uldary olardy árqashan jigerlenderip, baı bolýǵa ıtermelep júredi.