«Biz nege damymaımyz?»: Alǵabas aýdanynda sapasyz asfalt tóselýde

Foto: ashyq derekkóz

Shyǵys Qazaqstan oblysy, Kúrshim aýdanyndaǵy Alǵabas aýylynyń turǵyndary aýylǵa baratyn 7 shaqyrym joldyń jaýynǵa qaramaı sapasyz júrgizilip jatqanyna narazy, dep habarlaıdy Qandastar.kz.

Bul týraly óziniń áleýmettik paraqshasynda depýtat Dáýlet Muqaev jarııalady. Depýtattan kómek surap aýyl turǵyndary vıdeo joldaǵan. Vıdeoda er adam 170 mln teńgeniń salyný kerek jol tek jamaýmen shektelgenin aıtady. Onyń ústine neshe kún jaýynǵa qaramaı balshyqtyń ústine tóselýde. Depýtattyń aıtýynsha, osy saryndaǵy hattar legi óte kóp.

– Biz nege damymaımyz? Sebebi kóp nárseni teris isteımiz. Úı salamyz, artynsha jol salamyz. Sosyn ony buzyp, jol astyna qubyr, kabel salamyz. Aqsha joq emes, bólinýi bólinedi-aý. Biraq sony durys basqara almaǵan soń, talan-tarajǵa túsip, sońynda qarapaıym halyq opyq jeıdi. Odan keıin qalǵan aqshamen boran bolsyn, jańbyr bolsyn, eshteńege qaramaı áıteýir, joldy tez-tez bitirý kerek bolady. Vıdeoda ShQO, Kúrshim aýdany, Alǵabas aýylyna barar jol. Mine, sonyń aıqyn mysaly osy. Bólingen aqsha joǵarydan aýylǵa jetkenshe, dókeılerdiń ýysyna túskenshe, 20 santımetrlik asfalt 15 bolady, 15 sm asfalt 7-8 sm bolady, – deıdi ol.

Depýtat vatsap nomerine kelgen hattan úzindi jarııalady.

«Búgin 29 qazan, bul 7 km joldyń jóndeý jumysy. Merdiger jumysyn bastaǵannan beri aýyl halqy kúnde eskertýmen keledi JKH mekemesinde aýdandyq basynda turyp shaqyrdy kelmedi tekserýshi organ kelmeıdi, eshkim baqylaýǵa almaıdy, aýyldyq ákim kelip eskertý jasaıdy biraq ony tyńdamaıdy. Kúrshim aýdany men Alǵabas aýylynyń arasy 10 km osydan 4-5 jyl birinshi salynǵan asfalt joldyń qalyńdyǵy nebári 1.5 sm osyny teksergen oblystyq antıkor, laboratorııa kelip alǵan analızden de sapasyz nátıje shyqqan. Biraq merdigerge eshqandaı shara qoldanǵan joq» – deıdi aýyldyqtar.