«ءبىزدىڭ اعاي تاماشا»: استانادا بۇكىل وقۋشىسىنىڭ ەسىمىن بىلەتىن ديرەكتور جۇمىس ىستەيدى

فوتو: ۆيدەودان سكرينشوت

استانادا بۇكىل وقۋشى ەسىمىن جاتقا بىلەتىن ديرەكتور  نۇرتاس جاعاباەۆ №104 ورتا مەكتەپتى باسقارىپ وتىر, دەپ حابارلايدى Qaz365.kz تىلشىسى ەۋرازيا ارناسىنا سىلتەمە جاساپ.

مەكتەپ ديرەكتورىنىڭ ماماندىعىنا دەگەن ماحاباتى سونداي, ءتىپتى بيىل عانا 1 سىنىپقا قادام باسقان بۇلدىرشىندەردىڭ ەسىمدەرىن جاتقا بىلەدى. جۇمىستان تىس ۋاقىتتا شاكىرتتەرىمەن اسىق ويناپ, تەاترعا بارادى ەكەن.

نۇرتاس جاعاباەۆ مەكتەپكە تاڭعى 7-دەن كەتە كەلەدى. ول وقۋشىلارىن ءوزى قارسى الىپ, ساباققا ساتتىلىك تىلەيتىن كورىنەدى. ءتىپتى كوپشىلىگىن جاڭىلماي تانىپ, ەسىمدەرىن اتاپ جاتقانىن بايقادىق. «كوڭىل-كۇيلەرىڭ قالاي? مەن سەندەردى وتە قاتتى جاقسى كورەمىن! وقۋدا وزات بولىڭدار! كۇندەرىڭ ءساتتى ءوتسىن!» دەپ شاكىرتتەرىنە تىلەگىن ارنايدى.

№104 ورتا مەكتەپتە بالاسى وقيتىن  جانىبەك قۋانىشبەكوۆ مەكتەپ باسشىسى تۋرالى پىكىر ءبىلدىردى.

«بيىل تۇڭعىشىمىز 1 سىنىپقا بارىپ جاتىر. ەندى العاش كەلگەن كۇننەن باستاپ بالاعا مەكتەپ قاتتى ۇنادى. ءبىزدىڭ وقۋشى كەزىمىزدە مەكتەپ ديرەكتورىن كەزدەستىرۋ اركىمگە بۇيىرا بەرمەيتىن باقىت ەدى عوي, بىلايشا ايتقاندا. ال قازىر ەندى ءبىزدىڭ مەكتەبىمىزدىڭ ديرەكتورى بالالاردى ءوزى قارسى الىپ, اتا-انا كەلسە دە ءوزى شىعىپ تىكەلەي بايلانىستا. كەز كەلگەن ۋاقىتتا سۇراعىمىزعا جاۋاپ الا الامىز», – دەيدى وقۋشىنىڭ اكەسى.

سونىمەن قاتار مەكتەپ باسشىسى كىشكەنتايلاردىڭ عانا كوڭىلىن تاپپايدى, جوعارعى سىنىپتارمەن دە ەتەنە بايلانىستا. ول قازاق ءتىلى مەن ادەبيەتىنەن ساباق بەرەدى. ال قوڭىراۋدا اسىق ويناپ, تەننيستىڭ ءتۇبىن تۇسىرەدى ەكەن. بالا  بىلىمدى, مادەنيەتتى ءھام تاربيەلى بولۋى ءۇشىن اۋەلى ءوزىمىز مەيىرىمدى بولۋىمىز كەرەك دەيدى.

«قازىرگى ۋاقىتتا بورمەن, ۋكاسكانى قولعا الىپ ساباق بەرسەك, ارينە, ءبىزدىڭ وقۋشىلارىمىز ول نارسەنى ءتۇسىنىپ قابىلدامايدى. وقۋشىلاردىڭ ءوز تىلىمەن ساباق بەرە ءبىلۋىمىز كەرەك. دوپتى قالاي لاقتىرساڭ, كەيىن ساعان سولاي ۇشىپ كەلەدى. سوندىقتان ءبىرىنشى كەزەكتە ءوزىمىز مەيىرىمدىلىك تانىتساق, ونى كورگەن بالا ول ءبىلىمدى, مادەنيەتتى, تاربيەلى بولىپ وسەدى», – دەيدى مەكتەپ باسشىسى.

نۇرتاس جاعاباەۆ باسقارىپ وتىرعان №104 ورتا مەكتەپ بيىل عانا اشىلىپتى. ول بۇعان دەيىن قىزىلسۋ اتىنداعى ورتا مەكتەپ پەن №43 مەكتەپتە ديرەكتور بولعان. قاي جەردە جۇرسە دە اينالاسىنداعىلارعا قۋانىش سىيلاپ جۇرەتىن كورىنەدى.

باسشى قىزمەتىن ارىپتەستەرى جوعارى باعالايدى. اتالمىش ءبىلىم ورداسىنداعى تاريح ءپانى مۇعالىمى الما جۇكەن ديرەكتوردىڭ وتە مەيىرىمدى, قامقور باسشى ەكەنىن ايتتى.

«ول كىسى وتە كەرەمەت باسشى. مەيىرىمدى, وتە قامقور. مەكتەپتىڭ تەك ءبىلىم سالاسىنا عانا ەمەس, سونىمەن قاتار قوعامدىق ومىرىنە وتە كوپ ىستەر جاساپ جاتىر. ءاردايىم ءبىزدى تۇسىنۋگە, قولداۋعا تىرىسادى», – دەيدى تاريح ءپانى مۇعالىمى.

ماماندىق پەن ادالدىقتى ۇيلەستىرىپ, كوپ ىقىلاسىنا بولەنگەن ازاماتتىڭ ۇستازدىق ۇلى جولعا ۇسكەنىنە 20 جىلدان اسىپتى. بۇگىندە 140-قا جۋىق مامان, 1700 شاكىرتكە باس-كوز بولىپ وتىر.