«Bizdiń aǵaı tamasha»: Astanada búkil oqýshysynyń esimin biletin dırektor jumys isteıdi

Foto: Vıdeodan skrınshot

Astanada búkil oqýshy esimin jatqa biletin dırektor  Nurtas Jaǵabaev №104 orta mektepti basqaryp otyr, dep habarlaıdy Qaz365.kz tilshisi Eýrazııa arnasyna silteme jasap.

Mektep dırektorynyń mamandyǵyna degen mahabaty sondaı, tipti bıyl ǵana 1 synypqa qadam basqan búldirshinderdiń esimderin jatqa biledi. Jumystan tys ýaqytta shákirtterimen asyq oınap, teatrǵa barady eken.

Nurtas Jaǵabaev mektepke tańǵy 7-den kete keledi. Ol oqýshylaryn ózi qarsy alyp, sabaqqa sáttilik tileıtin kórinedi. Tipti kópshiligin jańylmaı tanyp, esimderin atap jatqanyn baıqadyq. «Kóńil-kúıleriń qalaı? Men senderdi óte qatty jaqsy kóremin! Oqýda ozat bolyńdar! Kúnderiń sátti ótsin!» dep shákirtterine tilegin arnaıdy.

№104 orta mektepte balasy oqıtyn  Jánibek Qýanyshbekov mektep basshysy týraly pikir bildirdi.

«Bıyl tuńǵyshymyz 1 synypqa baryp jatyr. Endi alǵash kelgen kúnnen bastap balaǵa mektep qatty unady. Bizdiń oqýshy kezimizde mektep dırektoryn kezdestirý árkimge buıyra bermeıtin baqyt edi ǵoı, bylaısha aıtqanda. Al qazir endi bizdiń mektebimizdiń dırektory balalardy ózi qarsy alyp, ata-ana kelse de ózi shyǵyp tikeleı baılanysta. Kez kelgen ýaqytta suraǵymyzǵa jaýap ala alamyz», – deıdi oqýshynyń ákesi.

Sonymen qatar mektep basshysy kishkentaılardyń ǵana kóńilin tappaıdy, joǵarǵy synyptarmen de etene baılanysta. Ol qazaq tili men ádebıetinen sabaq beredi. Al qońyraýda asyq oınap, tennıstiń túbin túsiredi eken. Bala  bilimdi, mádenıetti hám tárbıeli bolýy úshin áýeli ózimiz meıirimdi bolýymyz kerek deıdi.

«Qazirgi ýaqytta bormen, ýkaskany qolǵa alyp sabaq bersek, árıne, bizdiń oqýshylarymyz ol nárseni túsinip qabyldamaıdy. Oqýshylardyń óz tilimen sabaq bere bilýimiz kerek. dopty qalaı laqtyrsań, keıin saǵan solaı ushyp keledi. Sondyqtan birinshi kezekte ózimiz meıirimdilik tanytsaq, ony kórgen bala ol bilimdi, mádenıetti, tárbıeli bolyp ósedi», – deıdi mektep basshysy.

Nurtas Jaǵabaev basqaryp otyrǵan №104 orta mektep bıyl ǵana ashylypty. Ol buǵan deıin Qyzylsý atyndaǵy orta mektep pen №43 mektepte dırektor bolǵan. Qaı jerde júrse de aınalasyndaǵylarǵa qýanysh syılap júretin kórinedi.

Basshy qyzmetin áriptesteri joǵary baǵalaıdy. Atalmysh bilim ordasyndaǵy tarıh páni muǵalimi Alma Júken dırektordyń óte meıirimdi, qamqor basshy ekenin aıtty.

«Ol kisi óte keremet basshy. Meıirimdi, óte qamqor. Mekteptiń tek bilim salasyna ǵana emes, sonymen qatar qoǵamdyq ómirine óte kóp ister jasap jatyr. Árdaıym bizdi túsinýge, qoldaýǵa tyrysady», – deıdi tarıh páni muǵalimi.

Mamandyq pen adaldyqty úılestirip, kóp yqylasyna bólengen azamattyń ustazdyq uly jolǵa úskenine 20 jyldan asypty. Búginde 140-qa jýyq maman, 1700 shákirtke bas-kóz bolyp otyr.