جاڭالىقتار
«ءبىزدىڭ اسكەرگە جاۋ كەرەك ەمەس, ءوز-ءوزىن قىرىپ تاستايدى»: جۋرناليست قازاق اسكەرىندەگى سۇمدىقتى ايتتى
كوللاج: Sn.kz
تانىمال جۋرناليست, باسپاگەر, ءارى قوعام بەلسەندىسى شىڭعىس مۇقان التا ايدان بەرى ەس-ءتۇزسىز كومادا جاتقان ساربار ەرباياننىڭ دا جاعدايىنا توقتالدى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.
باسپاگەر ەرباياننىڭ قازىرگى جاعدايىنا الاڭداپ, بۇعان دەيىن اسكەردە تالاي سارباز كوز جۇمعانىن ءسوز ەتتى. بۇل تۋرالى ول الەۋمەتتىك جەلىدەگى پاراقشاسىندا جازدى.
«ءبىزدىڭ اسكەرگە جاۋ كەرەك ەمەس, ءوز-ءوزىن قىرىپ تاستايدى.
ەربايان باۋىرىما جانىپ اشىپ, جانىمدى قويارعا جەر تاپپاي وتىرمىن. مۇنداي سۇمدىق جاعدايلار ءۇن-ءتۇنسىز وتپەۋى كەرەك. ساربازدىڭ مەحناتى ەڭ بولماعاندا كەيىنگى ساربازداردى امان الىپ قالۋ ءۇشىن قوعامدى اياعىنان تىك تۇرعىزۋعا ءتيىس.
@ulysmedia.kz -ءتىڭ جەتەكشىسى @samal.live “سوڭعى ءۇش جىلدا 270 اسكەري قايتىس بولعانىن, ونىڭ ىشىندە 90 سارباز ءوز-وزىنە قول سالىپ قايتىس بولعان” (دەرەك كوزى بەلگىسىز) دەگەن دەرەك كەلتىرىپتى.
بۇل اسكەرگە سىرتقى جاۋ كەرەك ەمەس, ءوز-ءوزىن قىرىپ تاستايدى دەپ ويلاپ وتىرعان شىعارسىز. مەن دە وسىلاي ويلاپ ۇلگەردىم.
يزرايل دەگەن ەل بار, اسكەري بورىشىن بارلىعى وتەيدى, قىزدار دا, ۇلدار دا. اسكەردە ءدال قازىر 170 مىڭ ادام بورىشىن وتەپ جاتىر (قازاقستاندا 110 مىڭ اسكەر). وسى يزرايل اسكەر اراسىنداعى الىمجەتتىكتەن ابدەن ساباق العان ەل. 2014 جىلى قاتارلاستارىنىڭ قورلىعىنا شىداماي داۆيد شنايدەر وزىنە قول جۇمساپ, رەزونانس بولعان. 2010 جىلى ناداۆ سەلا دەگەن سارباز دا وزىنە قول جۇمساعان. سودان “ارنايى ليلي” اتتى باعدارلاما قابىلدانىپ, انتيبۋلليڭ ءىس-شارالارى ىسكە استى. سودان سوڭ جاعداي تۇزەلگەن.
“اقىماق وزگەنىڭ ەمەس, ءوز قاتەلىگىنەن دە ساباق المايدى” دەۋشى مە ەدى, ەۆرەي حالقى ءوز قاتەلىگىنەن ساباق الىپتى.
ەندى, بىزدەگى جاعدايدى ايتا المايمىن. بىزدە قاتەلىكتەن ساباق الۋ دەگەن جوق. ەرباياننىڭ جاعدايى, مىنە وسىنداي. سودان نە وزگەردى? ەشنارسە! وعان دەيىن دە تالاي سارباز كوز جۇمدى. بۇدان سوڭ دا كوز جۇمادى. 99%-ىن قوعام ەستىمەيدى.
مەنىڭ اتامنىڭ ءىنىسىنىڭ بالاسى كەڭەس كەزىندە اسكەردەن اۋىتقىپ كەلدى. سودان ادام بولمادى. سوڭىندا جىندىحانادا قايتىس بولدى. 90-جىلدارى اۋىلداعى ءبىر اعايىن اعامىز اسكەردەن ءتىرى ورالمادى. سول جاعداي ءالى وزگەرمەپتى. سەبەبى ورىستىڭ ۇرداجىق مىنەزىنە قۇرىلعان پسيحو-ەموتسيالىق جاعداي سول باياعىداي, كەڭەس كەزىنەن كەلە جاتىر.
نەسىن ايتامىز, بىزدە الىمجەتتىك تەك اسكەردە ەمەس, جىلدا توبەلەستەن قانشاما وقۋشى قايتىس بولادى. انتيبۋلليڭ وندا دا وقۋ-تاربيە ۇدەرىسىنىڭ ماڭىزدى بولىگىنە اينالا العان جوق.
شىنىندا دا, قازىر بالالاردىڭ بولاشاعىنان قورقا باستادىم. كەلەر ۇرپاققا قانداي قوعامدى مۇرا ەتىپ قالدىرىپ بارا جاتىرمىز? دۇرىسىراق قوعامدى قالدىرا الار ما ەدىك?..», – دەپ جازدى باسپاگەر.
