بقو-دا ايەلىمەن جانجالداسقان ەر ادام ەكى پوليتسەيدى پىشاقتاعان

فوتو: Polisia.kz

ءىىم پوليتسياعا قارسىلىق كورسەتىپ, باعىنباۋ ارەكەتتەرى ءۇشىن جاۋاپكەرشىلىك قاراستىرىلعانىن ەسكە سالادى, دەپ جازدى qandastar.kz

«2024 جىلدىڭ قورىتىندىسىنا سايكەس وسىنداي 271 دەرەك تىركەلدى. ونىڭ 127-ءسى ماس كۇيدە, 87-ءسى بۇرىن سوتتالعاندارمەن جانە 19-ى ادامدار توبىمەن جاسالعان», — دەدى ءىىم وزىندىك قاۋىپسىزدىك دەپارتامەنتى باستىعىنىڭ ورىنباسارى التىنبەك شۇيىنشاليەۆ.

پوليتسيا قىزمەتكەرلەرىنە قارسى كۇش قولدانىپ, زاڭسىز ارەكەت جاساعانى ءۇشىن 225 ازامات سوتتالعان. مىسالى, باتىس قازاقستان وبلىسى تەرەكتى اۋدانىنىڭ تۇرعىنى بەس جىلعا باس بوستاندىعىنان ايىرىلدى. جۇبايىمەن جانجالداسقان ەر ادام ەكى ۋچاسكەلىك پوليتسيا ينسپەكتورىنا پىشاق الا جۇگىرىپ, ولاردى جاراقاتتاعان.

اقتوبە وبلىسىنىڭ قاندىاعاش ستانتسياسىندا دا وسىنداي جاعداي بولدى.

«استانا – اتىراۋ» باعىتىنداعى پويىز جولاۋشىسى ىشىمدىك ءىشىپ, پاترۋلدىك قىزمەت ينسپەكتورلارىنا فيزيكالىق قارسىلىق كورسەتكەن. دەنساۋلىققا زيان كەلتىرگەنى ءۇشىن ەر ادام ءتورت جىلعا باس بوستاندىعىنان ايىرىلدى.

«پوليتسيا ازاماتتاردىڭ ءومىرىن, دەنساۋلىعىن, قۇقىقتارىن, بوستاندىقتارىن جانە قوعامنىڭ زاڭدى مۇددەلەرىن قورعاۋدى قامتاماسىز ەتەدى. قۇقىقتىق نورمالاردى ساقتاماي, ادىلەتتى قازاقستان قۇرۋ مۇمكىن ەمەس. ازاماتتاردى زاڭدى ساقتاۋعا, بيلىك وكىلدەرىنە باعىنباۋ جانە ولاردى قورلاۋ فاكتىلەرىنە جول بەرمەۋگە شاقىرامىز. مۇنداي ارەكەتتەر ءۇشىن اكىمشىلىك جانە قىلمىستىق جاۋاپكەرشىلىك كوزدەلگەنىن ەسكە سالامىز», — دەدى التىنبەك شۇيىنشاليەۆ.