بقو-دا نەسيە تولەۋگە بارعان ايەل ءوزىن «ولىلەر» تىزىمىنەن تاپقان

فوتو: ۆيدەودان سكرينشوت

نەسيەسىن وتەمەك بولعان باتىس قازاقستان وبلىسىنىڭ تۇرعىنى ءوزىنىڭ «ولىلەر» ساناتىندا ەكەنىن انىقتادى, دەپ حابارلايدى Qaz365.kz تىلشىسى «موي گورود» باسىلىمىنا سىلتەمە جاساپ.

جاڭاقالا اۋىلى تۇرعىنىنىڭ وقيعاسىن باياندايتىن بەينەجازبا جەرگىلىكتى بلوگەردىڭ پاراقشاسىندا جاريالاندى.

ايەلدىڭ سوزىنشە, ول اي سايىنعى نەسيەسىن وتەپ جۇرگەن, بىراق كەيىننەن اقشا وعان قايتىپ كەلگەن.

«مەن بۇل اقشانى قايتادان اۋدارىپ جىبەردىم, بىراق قاراجات شوتىمنان الىنبادى. وپەراتورلارعا جۇگىندىم, ولار ماعان ء«سىز 4 شىلدە كۇنى استاناداعى اۋرۋحانادا قايتىس بولدىڭىز دەپ شىعىپ تۇر» دەدى. ماعان احاج-عا, سالىق باسقارماسىنا, حقكو-عا بارۋ كەرەكتىگى ايتىلدى. قازىر وسى ماسەلەمەن اينالىسىپ جاتىرمىن. جالاقى الدىم, «كاسپي» شوتتارى اشىق, اۋرۋحاناعا ءدارى-دارمەك الۋ ءۇشىن باردىم, ولاردىڭ بازاسىندا دا قايتىس بولعانىم تۋرالى شىعىپ تۇر. الايدا ول جەردىڭ قىزمەتكەرلەرى ماعان كومەككە كەلىپ, ماعان ءدارى جازىپ بەردى, سەبەبى مەن قان قىسىمى بويىنشا ەسەپتە تۇرمىن. جاقىندا زەينەتكەرلىككە شىعامىن, جيناقتارمەن نە ىستەيتىنىمدى, نەسيە نە بولاتىنىن, ءوسىمپۇل سالىنباي ما دەپ الاڭدايمىن», – دەدى بقو تۇرعىنى.

«ازاماتتارعا ارنالعان ۇكىمەت» مەملەكەتتىك كورپوراتسياسى» كەاق وسى جاعدايعا قاتىستى تۇسىنىك بەردى.

«4 شىلدە كۇنى استانانىڭ مەديتسينالىق مەكەمەسىندە ءبىر ايەل كوز جۇمدى. مەديتسينالىق ۇيىمنىڭ قىزمەتكەرلەرى دەرەكتەردى بازاعا ەنگىزگەن كەزدە جسن-نىڭ ءبىر سانىندا قاتەلەسىپ كەتكەن. بازاعا بقو تۇرعىنىنىڭ دەرەكتەرى جازىلدى. ءتيىستى مەديتسينالىق ۇيىم بازاداعى دەرەكتەردى تۇزەتۋى ءتيىس», – دەدى حقكو.