بقو-دا تۇرعىن ءۇي قۇرىلىسى قارقىن الدى

باتىس قازاقستان وبلىسىنىڭ سىرىم اۋدانىندا ولەڭتى جانە بۇلدىرتى وزەندەرىنىڭ تاسۋىنان 3 اۋىلدى سۋ باسىپ, 243 ۇيگە سۋ كىرگەن ەدى.

ارنايى كوميسسيا شەشىمىمەن سونىڭ 114-ءى جارامسىز دەپ تانىلىپ, جاڭادان سالىناتىن بولدى. قازىر مەردىگەرلەر انىقتالىپ, قۇرىلىس باستالدى. بيىلعىداي تاسقىندى بۇرىن-سوڭدى كورمەدىك دەيدى بۇلدىرتى اۋىلىنىڭ كونەكوزدەرى. قىردان اققان قىزىل سۋ بۇلدىرتى وزەنىنىڭ ارناسىنا سىيماي, اۋىلدىڭ شەتكەرى كوشەلەرىنە دەيىن جايىلعان. 25 ءۇي جارامسىز بولعان. قازىر قالپىنا كەلتىرۋ جۇمىستارى قارقىن الدى. ويپاڭ جەردەگى 10 ءۇي اۋىل شەتىنە كوشىرىلمەك.

كەلەسىدە سۋ باسپاس ءۇشىن وزگەلەرىنىڭ ىرگەتاسى دا بارىنشا بيىك قىپ قۇيىماق. ايبەك ماجيت, مەردىگەر مەكەمە وكىلى: – جەردەن 80 سم شىعىپ تۇرادى, جەرگە 80 سم كىرىپ تۇرادى. 1 مەتر 60 فۋندامەنت. فۋندامەنتكە جاقسى كوڭىل بولگەن. 8 بريگادا قازىر جۇمىس جاساپ جاتىر ءۇيدى قاتار ءبىتىرۋ ماقساتىندا. جەرگىلىكتى تۇرعىنداردان ەكى بريگادانى الدىق, قالعاندارى ءوڭىردىڭ باسقا اۋداندارىنان قۇراعان. جومارت نۇرپەيىس, بۇلدىرتى اۋىلىنىڭ تۇرعىنى: – مەنىڭ ءۇيىم «شيتوۆوي» ءۇي بولعان.

ەسكى ءۇي عوي. تابيعي اپاتتان سۋ كەتىپ, وسى جەردە وسى كوشەدەن 10 ءۇي كەتىپ قالدىق قوي. سول «سنوسقا» كەتتى.  قۇرىلىستى باستاپ جاتىر. ريزامىز. فۋندامەنت قۇيىپ جاتىر كەلىپ. تاستارىن تاسىپ جاتىر. سىرىم اۋدانىندا بۇلدىرتىدان باسقا ولەڭتى, جىمپيتى اۋىلدارى دا تاسقىننان زارداپ شەكتى. سۋعا كەتكەن 253 ءۇيدىڭ 114 جارامسىز دەپ تانىلدى. قۇرىلىسقا قاجەتتى قارجى «قازاقستان حالقىنا» قورىنان قارالماق. ودان بولەك ولەڭتى وزەنىنىڭ جاعاسىنا قورعانىس بوگەتىن سالۋ كوزدەلگەن.

قايرات تولەپوۆ, سىرىم اۋدانى اكىمىنىڭ ورىنباسارى: – ولەڭتى جاعاسى بويىنشا دامبا سالامىز دەپ وتىرمىز. جوبا-سمەتالىق قۇجاتتارى جاسالعان. سوعان وزگەرىس ەنگىزىپ جاتىرمىز. سودان كەيىن قارجى بولىنگەسىن سول ولەڭتى بويىنا ۇزىندىعى 4 كم, بيىكتىگى 7 مەتر بولاتىنداي دامبا سالامىز دەپ جوسپارلاپ وتىرمىز. سىرىم اۋدانىندا سالىناتىن تۇرعىن ءۇي قۇرىلىسىنا 8 مەردىگەر تارتىلعان. قازىر بارلىق ءۇيدىڭ قۇرىلىسى باستالدى.