بقو-دا جانتۇرشىگەرلىك جول اپاتى بولدى: قازا تاپقانتاردىڭ اراسىندا پوليتسەي مەن ونىڭ ايەلى بار

وقيعا ورنى, ۆيدەودان كادر: t.me/uralskweek_official

24 تامىزدا باتىس قازاقستان وبلىسىندا جول اپاتى بولىپ, سالدارىنان پوليتسەي مەن ونىڭ ايەلى كوز جۇمدى. بۇل تۋرالى وبلىستىق پوليتسيا دەپارتامەنتىنە سىلتەمە جاساعان KAZ.NUR.KZ حابارلايدى.

ۆەدومستۆونىڭ ءباسپاسوز قىزمەتىنىڭ حابارلاۋىنشا, 24 تامىز كۇنى ساعات 08.20-دا چاپاەۆو –جالپاقتال – كازتالوۆكا تاسجولىندا قازتالوۆ اۋدانى جالپاقتال اۋىلىنىڭ ماڭىندا ادام ولىمىمەن اياقتالعان جول-كولىك وقيعاسى بولعان. «گاز-3102» اۆتوكولىگىنىڭ جۇرگىزۋشىسى رۋلگە يە بولا الماي, جول جيەگىندە تۇرعان «كاماز» كولىگىمەن سوقتىعىسقانى انىقتالدى. سالدارىنان ءتورت ادام قازا تاۋىپ, ءۇش ادام اۋرۋحاناعا جاتقىزىلدى. ولاردىڭ ىشىندە ەكەۋى – كامەلەتكە تولماعاندار», – دەپ مالىمدەدى بقو پوليتسيا دەپارتامەنتىنىڭ وكىلدەرى.

قازىر بۇل جول-كولىك وقيعاسى بويىنشا سوتقا دەيىنگى تەرگەۋ امالدارى جۇرگىزىلىپ جاتىر.

«جول-كولىك اپاتى كەزىندە «گاز-3102″ اۆتوكولىگىنىڭ جولاۋشىلارى بولعان پوليتسيا قىزمەتكەرى مەن ونىڭ ايەلى قازا تاپتى.

باتىس قازاقستان وبلىستىق پوليتسيا دەپارتامەنتىنىڭ باسشىلىعى مەن جەكە قۇرامى قازا بولعانداردىڭ وتباسى مەن جاقىندارىنا قايعىرىپ كوڭىل ايتادى.

پوليتسەيلەر جول قوزعالىسىنا قاتىسۋشىلاردىڭ بارلىعىن جول قوزعالىسى ەرەجەلەرىن قاتاڭ ساقتاۋعا شاقىرادى», – دەلىنگەن ۆەدومستۆو حابارلاماسىندا.

ايتا كەتەيىك, بۇعان دەيىن 23 تامىز ساعات 18:15 شاماسىندا باتىس ەۋروپا – باتىس قىتاي تاسجولىنىڭ باتىس باعىتتاعى 278-شاقىرىمىندا ۇلكەن جول اپاتى بولعانىن جازعان ەدىك.

سەگىز جەڭىل كولىك تيەلگەن جۇك كولىگى التى جەڭىل كولىك تيەلگەن باسقا جۇك كولىگىمەن سوقتىعىسقان. سوقتىعىس سالدارىنان جۇك كولىكتەرى دە, ولاردىڭ ۇستىندەگى جەڭىل كولىكتەر دە جانىپ كەتكەن.