بلوگەر الىشەر ەلىكباەۆتىڭ سالىقشىلاردى سوتتا جەڭگەنى راس پا?

فوتو: ينستاگرام

مەملەكەتتىك كىرىستەر كوميتەتى سوتتا كوميتەتتىڭ بلوگەر الىشەر ەلىكباەۆتان جەڭىلگەنى جايلى اقپاراتتى جوققا شىعاردى, دەپ حابارلايدى qandastar.kz

وسى جىلدىڭ اقپان ايىندا الەۋمەتتىك جەلىدە كوپتەگەن بلوگەرلەردىڭ سالىقتى تولەمەگەنى تۋرالى اقپارات تارادى. ولاردىڭ اراسىندا ەلىكباەۆ تا بار ەدى.

Orda.kz جازعانداي, بلوگەر ماسەلەنى سوت ارقىلى شەشۋدى ءجون كورگەنىن ايتىپ الەۋمەتتىك جەلىسىندە جازبا جاريالادى. ول ەشقاشان سالىق زاڭناماسىن بۇزباعانىن ايتتى. ونىڭ سوزىنشە, وزىنە اۋدارىلعان قايىرىمدىلىق اقشالارىنىڭ ءبارى ءتيىستى ورنىنا جۇمسالعان.

ياعني, ونىڭ شوتىنداعى ۇلكەن اۋدارىمداردىڭ ءبىر بولىگى قايىرىمدىلىققا — بالالار حوسپيستەرىنە ارنالعان رەانيموبيلدەرگە, بۇيرەك ترانسپلانتاتسياسى بويىنشا وتالارعا, ۋكرايناعا جابدىقتار ساتىپ الۋعا جۇمسالعان. وسىلايشا ول بۇل قاراجاتتىڭ بارلىعى تىكەلەي قورلارعا, ەمحانالارعا جىبەرىلگەنىن مالىمدەدى.

وسى جازباسىن نەگىزگە العان تىلشىلەر جاڭالىقتار جازا باستادى. اقىرى الەۋمەتتىك جەلىدە سوت مەملەكەتتىك كىرىستەر كوميتەتىنىڭ ارەكەتىن زاڭسىز دەپ تاپقانى جانە بلوگەردىڭ سوتتا جەڭگەنى تۋرالى اقپارات تارادى.

مەملەكەتتىك كىرىستەر كوميتەتى بۇل جايلى بىلاي دەدى:

«الەۋمەتتىك جەلىلەردە بلوگەر الىشەر ەلىكباەۆتىڭ مەملەكەتتىك كىرىستەر ورگاندارىن سوتتا جەڭىپ شىققانى جونىندە اقپارات تاراتىلۋدا. بۇل شىندىققا سايكەس كەلمەيدى.
سوت ونىڭ تالابىن ءمانى بويىنشا قاراعان جوق جانە مەملەكەتتىك كىرىستەر ورگاندارىنىڭ ارەكەتتەرىن زاڭسىز دەپ تانىعان جوق.
2025 جىلعى 15 تامىزداعى جاعداي بويىنشا, مەملەكەتتىك كىرىستەر ورگاندارىنىڭ ارەكەتتەرىن زاڭسىز دەپ تانۋ تۋرالى نەمەسە وزگە دە سوت شەشىمدەرى مەن جولدانعان حابارلامالار جوق.
مەملەكەتتىك كىرىستەر ورگاندارىنىڭ ارەكەتتەرىن زاڭسىز دەپ تانۋ جونىندە تاراتىلىپ جاتقان اقپارات شىندىققا سايكەس كەلمەيدى.
باق وكىلدەرىنەن تەكسەرىلمەگەن دەرەكتەردى جاريالاۋدان باس تارتۋدى سۇرايمىز», — دەپ مالىمدەدى مەملەكەتتىك كىرىستەر كوميتەتىنىڭ ءباسپاسوز قىزمەتى.

ايتا كەتەيىك, بۇگىن, 15 تامىز كۇنى توقاەۆ زاڭعا ۇستازداردىڭ قۇقىعىن قورعاۋ جونىندە وزگەرىستەر ەنگىزۋدى ۇسىندى.