بلوگەر «ولىكتى» ليفتكە كىرگىزىپ, كوپشىلىككە پرانك جاسادى

فوتو: ۆيدەودان سكرينشوت

بلوگەر اراش گاسانوۆ ليفتكە «ولىك» كىرگىزىپ, پرانك جاساپ, سىنعا قالدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

ۆيدەودا كورىنىپ تۇرعانداي, ليفت ىشىندە جالعىز جاس جىگىت تۇرعان. بلوگەر مەن ونىڭ دوستارى ليفت ىشىنە ولگەن ادامنىڭ رولىندەگى «اكتەردى» كوتەرىپ, كىرگىزىپ تاستاپ كەتەدى دە جارىقتى ءوشىرىپ تاستايدى. ءبىر ساتتە ونسىز دا شوشىپ قالعان جىگىتتىڭ جانىنداعى «ولىك» ءتىرىلىپ كەتىپ, زارەسىن الادى.

بلوگەر مۇنى پرانك دەپ اتاپ, جىگىتكە ستوماتولوگيانىڭ 30 مىڭدىق سەرتيفيكاتىن ۇسىندى. وسىلايشا اراش گاسانوۆ ءتىس ەمحاناسىنىڭ جارناماسىن جاساعان.

«بۇل قويىلىم عانا, ءبارى ويلاستىرىلعان, قايتالاۋعا بولمايدى», – دەپ جازدى ۆيدەونىڭ استىنا.

جەلى قولدانۋشىلارى بلوگەردى قاتتى سىناپ, جاس بالانىڭ جۇرەگى جىرىلىپ كەتۋى مۇمكىن ەكەنىن جارىسا جازىپ جاتىر.

«وسى پرانك دەگەن بالە بولدى. مىنا بالانىڭ جۇرەگىندە اقاۋ بولسا نە بولادى? پرانك دەپ ادام ولتىرەسىڭدەر مە? ادامنىڭ زارەسىن ۇشىرىپ بەرگەن اقشالارىڭ قۇرىسىن», «بۇلاي بولمايدى, جۇرەگى اۋىراتىن بولسا شە», «مىناۋ نە ماسقارا, بالانىڭ جۇرەگى تايدى عوي», «قورىققاننان جۇرەگى توقتاپ قالسا قايتەر ەدىڭ», دەگەن پىكىرلەر قالدىرعان.

ەسكە سالايىق, ماقسات تولىقباەۆ پرانك جاساپ, كونتەنت تۇسىرەتىندەردى جاۋاپقا تارتۋدى سۇراعان ەدى.