قارجى جانە تولەمدەر

Bloomberg: الەم ميللياردەرلەرىنىڭ قاتارىندا قازاقستاندىق بار

10.01.2025

0 26

8 قاڭتاردا Bloomberg-ءتىڭ 500 ميللياردەرىنىڭ ءتىزىمى جاڭاردى. ولاردىڭ اراسىندا جالعىز قازاقستاندىق بار, – دەپ حابارلايدى qandastar.kz Massaget.kz سىلتەمە جاساپ.

Bloomberg ميللياردەرلەرىنىڭ يندەكسى – الەمدەگى ەڭ باي ادامداردىڭ كۇندەلىكتى رەيتينگى. ول 2012 جىلدان باستاپ جۇزەگە اسىرىلىپ كەلەدى. يندەكس كۇن سايىن نيۋ-يوركتەگى ساۋدا-ساتتىق جابىلعان كەزدە جاڭارتىلىپ وتىرادى.

رەيتينگكە سايكەس 8 قاڭتارداعى اقپارات بويىنشا الەمدەگى ەڭ باي ادام – امەريكالىق ميللياردەر يلون ماسك. ونىڭ بايلىعى 426 ميلليارد دوللارعا باعالانادى. ەكىنشى ورىندا – Amazon يەسى دجەفف بەزوس, ونىڭ بايلىعى 241 ميلليارد دوللار بولادى. ءۇشىنشى ورىندا Facebook جەلىسىنىڭ, مeta كومپانياسىنىڭ نەگىزىن قالاۋشى مارك تسۋكەربەرگ تۇر, ونىڭ اكتيۆتەرى 218 ميلليارد دوللارعا باعالانادى.

الەمدەگى ەڭ باي ون ادامنىڭ قاتارىنا امەريكالىق كاسىپكەر لارري ەلليسون, فرانتسۋز ميللياردەرى بەرنارد ارنو, Google-ءدىڭ نەگىزىن قالاۋشىلاردىڭ ءبىرى لارري پەيدج سەرىكتەسى سەرگەي برينمەن بىرگە, Microsoft-تىڭ بۇرىنعى ءىرى اكتسيونەرى بيلل گەيتس, Microsoft-تىڭ بۇرىنعى ديرەكتورى ستيۆ بالمەر جانە ينۆەستور ۋوررەن باففەت كىرەدى.

رەيتينگتەگى ەلدەر اراسىندا 190 دوللارلىق ميللياردەرى بار اقش كوش باستاپ تۇر. سونداي-اق رەيتينگتە قىتاي, ءۇندىستان جانە رەسەيدىڭ كوپتەگەن وكىلى بار.

رەيتينگتە قازاقستاننان جالعىز ادام بار, ول – ۆلاديمير كيم, ميللياردەر 415-ورىندا تۇر.

Bloomberg رەيتينگى ۆلاديمير كيمنىڭ بايلىعىن 7,11 ميلليارد دوللارعا باعالايدى. بيىل جىل باسىنان بەرى ول 53,8 ميلليون دوللارعا, ال كەيىنگى تاۋلىكتە 15,9 ميلليون دوللارعا ءوستى.

امەريكالىق باسىلىمنىڭ مالىمەتىندە ۆلاديمير كيم قازاقستان مەن قىرعىزستاندا اشىق تاسىلمەن مىس ءوندىرۋ كومپانياسىنىڭ, ياعني Kaz Minerals-تىڭ ديرەكتورى جانە بۇرىنعى توراعاسى ەكەنى ايتىلادى.

ىلمەكتەر