“بويكوت! جاستار بولىپ توي جاساۋدى دوعارۋ كەرەك”: جەلىدە جىگىت كوپشىلىككە ۇندەۋ تاستادى

جەلىدە جاس جىگىت قازاق ەلىنە ۇندەۋ جاساپ, ىسىراپشىلدىقتان باس تارتىپ, استا-توك توي جاساۋدى دوعارۋعا شاقىردى, دەپ جازادى  qandastar.kz  Alash.kz ۇلتتىق پورتالى.

“دوستار, ءبىر اۋىزدان توي دەگەن نارسەنى دوعارايىقشى. جاسى 56-57 شاماسىنداعى ايەل كەلدى. “بالام, ماعان 5-6 ملن كرەديت شىعارىپ بەرشى. سەنىڭ قولىڭنان كەلەدى عوي” دەيدى. مەن ول كىسىدەن “نە سەبەپتى كرەديت كەرەك?” دەپ سۇرايمىن. “بالامنىڭ تويىن جاساۋ كەرەك” دەيدى.

مەن سول نارسەنى تۇسىنبەيمىن. ءسويتىپ ول اپكەنى رەنجىتپەي, بىراق جاي سۇرادىم. “بالا-شاعاڭىز الداعى ۋاقىتتا سىزبەن بىرگە تۇرا ما? بولەك شىعا ما?” دەسەم, “بولەك شىعادى. وزدەرى پاتەر جالداپ تۇرادى” دەيدى.

“اپكە, تويعا كرەديت الىپ نە قىلاسىز? ەگەر ول اقشا تويعا كەتەتىن بولسا” دەدىم. توي ءوز-ءوزىن جابادى دەپ ويلايدى ادامدار. بىراق ول جەردە قۇدالىق دەگەن نارسە بار. كەرەك ەمەس دۇنيەلەر… توي بىتكەننەن كەيىن سول جاستار كەلگەن ادامداردىڭ بارلىعىنىڭ تويىنا قاتىسادى. بەرگەن اقشاسىن قايتارادى. باسپاناعا اقشا جيناي المايدى. نەگە وسى جاستار بولىپ توي دەگەن نارسەنى دوعارۋ كەرەك دەگەن وسىنداي ءبىر ترەند شىعارماسقا? 

اتا-انالارىمىز دا, ۇلكەن قاريالارىمىز دا ايتپايدى. مىسالى, بولادى عوي. ءتاتتى شايدا ەكى اتا-انا جولىعىپ, سيتۋاتسيانى قاراپ… جاعدايى بولسا, ماقۇل, توي ىستەسىن. بىراق جاعدايى جوق بولسا, ءبىر مامىلەگە كەلىپ, مىسالى “جاستارعا توي ىستەمەي-اق, سوعان باستاپقى جارنا رەتىندە وتباسى بانككە سالايىق” دەپ ايتسا بولادى. توي دەگەن ءبىر-اق كۇندە وتەدى. ءسىز تويمەن ەشكىمدى تاڭعالدىرا المايسىز.  كرەديتكە الىنعان نارسەنى سول توي يەسى قينالىپ تولەپ جۇرەدى.  ءسويتىپ ول باتپاق-قۇيرىقتان ەشقاشان شىعا المايدى. سونداعىسى ءبىر-اق كۇن. جەپ كەتەدى. قازىر ول تويعا بارعىسى كەلەتىن ادامدار جوق. ەشكىم بارعىسى كەلمەيدى. اقشا بەرگىسى كەلمەيدى. ويتكەنى قازىرگى زاماندا ءبىزدىڭ ەلىمىزدە قازاقتاردىڭ بارلىعى كرەديتكە باتىپ كەتكەن. توي دەگەن نارسەنى قويۋ كەرەك دەپ ءبىزدىڭ پرەزيدەنتىمىز قاسىم-جومارت توقاەۆتا: “توي قۋالايتىن ەمەس, وي قۋالايتىن كەزەڭمەن بەتپە-بەت كەلدىك” دەپ ايتقان. ءبىزدىڭ كوزقاراسىمىز باسقاشا عوي. ءوزىمىز قازىرگى زاماناۋي جاستار بولىپ توي دەگەن نارسەگە بويكوت جاساۋ كەرەك”,- دەدى جەلى قولدانۋشىسى.