بويجەتكەننىڭ بوكسەسىن ۇستاعان استانالىققا جازا تاعايىندالدى

استانادا قىزدىڭ بوكسەسىنەن ۇستاعان ەر ادام 5 تاۋلىككە قامالدى, دەپ حابارلايدى qandastar.kz.

جابىرلەنۋشى قىز Threads جەلىسىندە اكىمشىلىك سوت وتكەنىن, ونىڭ شەشىمى بويىنشا 58 جاستاعى ەر ادامعا 5 تاۋلىك قاماۋ جازاسى تاعايىندالعانىن جازدى.

اريانا ەسىمدى قىزدىڭ ايتۋىنشا, ەر ادام اكىمشىلىك قۇقىق بۇزۋشىلىق تۋرالى كودەكستىڭ 434-بابى «ۇساق بۇزاقىلىق» بويىنشا كىنالى دەپ تانىلىپ, 5 تاۋلىككە قاماۋعا الىندى. سونداي-اق ول سوتتا ەر ادامنىڭ كەشىرىم سۇراعانىن, الايدا ءوزىنىڭ وعان كونبەگەنىن ايتتى. قىزدىڭ سوزىنشە, مۇنداي ارەكەتكە الدەقايدا قاتاڭ جازا تاعايىندالۋى كەرەك.

جابىرلەنۋشى قوسىمشا ماتەريالدىق شىعىن ءوندىرىپ الۋدى سۇراعان, بىراق وعان بۇل ءۇشىن ازاماتتىق سوتقا قايتا ارىز بەرۋ كەرەك.

«ەموتسيالىق تۇرعىدا قاتتى زارداپ شەكتىم, پسيحولوگيالىق تۇرعىدان اۋىر ءتيدى. مۇمكىن ءتىپتى قالپىنا كەلۋ ءۇشىن پسيحولوگ كومەگى قاجەت شىعار دەپ ويلايمىن. ايەلدەردىڭ قاۋىپسىزدىگى ءۇشىن اتسالىسا العانىما قۋانىشتىمىن.  ىس بۇكىل ەلگە بەلگىلى بولىپ, سوڭىنا دەيىن جەتكەنىنە ريزامىن. كەز كەلگەن ماسەلەدە ۇندەمەي وتىرا بەرۋگە بولميتىنىن كورسەتە الدىم. ايەلدەر قاۋىمى, ءوز قاۋىپسىزدىكتەرىڭىزدى قاداعالاڭىزدار. ەرلەر, قۇرمەت پەن پاراساتتىلىق تانىتىڭىزدار», – دەپ جازدى ول.