جاڭالىقتار
بوكس فەدەراتسياسى Instagram ارقىلى جۇمىستان شىعارعان مىرزاعالي ايتجانوۆقا شاپان جاپتى
فوتو: اشىق دەرەككوزدەن
قازاقستان بوكس فەدەراتسياسى قر ەڭبەك سىڭىرگەن جاتتىقتىرۋشى, ۇلتتىق قۇرامانى ۇزاق جىلدار جاتتىقتىرعان مىرزاعالي ايتجانوۆقا قۇرمەت كورسەتتى, دەپ حابارلايدى Qaz365.kz.
«مىرزاعالي قۇلان ۇلىنىڭ قازاقستان بوكسىنا سىڭگەن ەڭبەگى زور. بۇگىنگى كۇنگە دەيىن بىلعارى قولعاپ شەبەرلەرىن دايىنداۋدا توككەن ماڭداي تەردى باعالايمىز جانە سىزگە العىس ايتامىز», – دەدى ءىس-شارادا قازاقستان بوكس فەدەراتسياسىنىڭ پرەزيدەنتى شاحمۇرات ءمۇتالىپ.
قازاقتىڭ ءداستۇرى بويىنشا, مىرزاعالي ايتجانوۆتىڭ يىعىنا شاپان جابىلىپ, باعالى سىيلىقتار تابىستالدى.
ايتا كەتەيىك, پاريج وليمپياداسىندا بوكستان قازاقستان ەرلەر قۇراماسى ءبىر كۇمىس مەدالمەن شەكتەلدى. وسىدان كەيىن مىرزاعالي ايتجانوۆ جانە تاعى 10 باپكەر قىزمەتىنەن كەتكەن بولاتىن. سول كەزدە الەۋمەتتىك جەلىدە كوپتەگەن پىكىرلەر ايتىلدى. باپكەرگە لايىقتى قۇرمەت كورسەتپەدى, «Instagram ارقىلى جۇمىستان شىعارا سالدى» دەگەن سوزدەر بولعان ەدى.
