جاڭالىقتار
بوكس وليمپيادا ويىندارىنىڭ باعدارلاماسىنا ەندى
فوتو: اشىق دەرەككوز
گرەكيانىڭ كوستا-ناۆارينو قالاسىندا وتكەن حالىقارالىق وليمپيادالىق كوميتەتىنىڭ (حوك) 144-ءشى سەسسياسىندا 2028 جىلى لوس-اندجەلەستە وتەتىن وليمپيادا ويىندارىنىڭ باعدارلاماسىنا بوكستى قوسۋ تۋرالى شەشىم قابىلداندى, دەپ جازدى qandastar.kz
باستاپقىدا بۇل سپورت ءتۇرى 2022 جىلدىڭ اقپانىندا 2028 جىلعى وليمپيادا ويىندارىنىڭ جارىس باعدارلاماسىنان شىعارىلعان ەدى.
بۇل شەشىم حالىقارالىق بوكس قاۋىمداستىعى (IBA) توڭىرەگىندە تۋىنداعان ماسەلەلەرگە بايلانىستى قابىلدانعان. 2023 جىلدىڭ ماۋسىمىندا حوك IBA-نىڭ رەسمي مويىنداۋىن تولىقتاي قايتارىپ العاننان كەيىن, بوكستىڭ وليمپياداداعى بولاشاعى بەلگىسىز بولىپ قالعان ەدى.
2024 جىلعى پاريج وليمپياداسىندا بوكس جارىستارى حوك-ءنىڭ ارنايى جۇمىس توبىنىڭ قاداعالاۋىمەن ءوتتى, بۇل سپورتتىڭ وليمپيادالىق قوزعالىس ءۇشىن ماڭىزدىلىعىن تاعى ءبىر مارتە دالەلدەدى.
وليمپيادالىق بوكستىڭ جاڭا دامۋ كەزەڭىندە باسقارۋ 2023 جىلى قۇرىلعان World Boxing حالىقارالىق بوكس فەدەراتسياسىنا جۇكتەلدى. قازىرگى تاڭدا بۇل ۇيىمعا 84 ۇلتتىق فەدەراتسيا مۇشە. جۋىردا World Boxing حوك-تەن ۋاقىتشا مويىنداۋ الىپ, الەمدىك دەڭگەيدە بوكستى دامىتۋ قۇقىعىنا يە بولدى.
“حوك-ءنىڭ بوكستى لوس-اندجەلەس وليمپياداسىنىڭ باعدارلاماسىنا قوسۋ تۋرالى شەشىمى – World Boxing پەن بۇكىل وليمپيادا كوميسسياسىنىڭ ماقساتتى جۇمىسىنىڭ كوپتەن كۇتكەن ناتيجەسى. بۇل – مىڭداعان سپورتشىنىڭ ارمانىن ساقتاپ قالۋ دەگەن ءسوز.
مەن وليمپيادا ويىندارىنىڭ جۇلدەگەرى رەتىندە مۇنىڭ بولاشاق بۋىن سپورتشىلارى ءۇشىن قانشالىقتى ماڭىزدى ەكەنىن تۇسىنەمىن. وليمپيادا – جاي عانا جارىس ەمەس, بۇل – ءۇمىتتىڭ سيمۆولى, شەبەرلىككە ۇمتىلۋ جانە الەمگە ءوزىڭدى كورسەتۋ مۇمكىندىگى.
ءبىز بوكستىڭ باي تاريحى مەن ءداستۇرىن وليمپيادا باعدارلاماسىندا ساقتاۋ ءۇشىن قادام سايىن ەڭبەك ەتتىك. ءاربىر جاس سپورتشى ءوز ەلىنىڭ تۋىن جەلبىرەتىپ, وليمپيادا تۇعىرىنا كوتەرىلە الۋى ءتيىس.
الدا ءالى كوپ جۇمىس كۇتىپ تۇر, ءبىز بۇل جاۋاپكەرشىلىكتى تولىق سەزىنەمىز. World Boxing ءادىل تورەشىلىك پەن سپورتشىلاردى ىرىكتەۋ ۇدەرىسىنىڭ اشىقتىعىن قامتاماسىز ەتۋ ءۇشىن بار كۇشىن سالادى”, – دەدى وليمپيادا كوميسسياسىنىڭ توراعاسى گەننادي گولوۆكين.
سونداي-اق, گەننادي گولوۆكيننىڭ ايتۋىنشا, World Boxing بۇرىنعىداي اشىقتىق پەن ادىلدىك قاعيدالارىن ۇستانىپ, ءاربىر بوكسشىنىڭ تەڭ قۇقىقتارى مەن مۇمكىندىكتەرىن قامتاماسىز ەتۋگە باسا نازار اۋدارادى.
ايتا كەتەيىك, قازاقستان بوكس فەدەراتسياسى 2024 جىلدىڭ قاراشا ايىندا World Boxing قۇرامىنا كىردى.
2028 جىلعى لوس-اندجەلەس وليمپياداسى 14-30 شىلدە ارالىعىندا وتەدى.
