جاڭالىقتار
«بولاشاعىڭدى بولجاپ بەرەمىن»: استانادا TikTok-تاعى جارناماسىنان كەيىن ەر ادام ۇستالدى
فوتو: pixabay.com
استانادا TikTok ارقىلى ادامداردى الدادى دەپ ايىپتالعان ەر ادام ۇستالدى, دەپ جازدى qandastar.kz
بۇل تۋرالى Stan.kz اقپارات اگەنتتىگى ىشكى ىستەر مينيسترلىگىنىڭ اقپاراتتىق پورتالىنا سىلتەمە جاساپ حابارلايدى.
پوليتسەيلەر استانادا سارىارقا اۋداندىق كريمينالدىق پوليتسيا قىزمەتكەرلەرى 43 جاستاعى ەر ادامدى ۇستاعانىن مالىمدەدى.
ول ءوزىن «كورىپكەلمىن», “بولاشاعىڭدى بولجاي الامىن» دەپ تانىستىرىپ, TikTok الەۋمەتتىك جەلىسى ارقىلى جارناما تاراتىپ, ەلدى الداپ كەلگەن. كۇدىكتىنىڭ كەم دەگەندە ەكى الاياقتىق ارەكەتكە قاتىسى بار ەكەنى انىقتالعان.
پوليتسيا دەرەگىنشە, ءبىرىنشى جاعدايدا ول ءبىر تۇرعىنعا جالعان قىزمەت كورسەتەمىن دەپ, 250 مىڭ تەڭگە كولەمىندە ماتەريالدىق شىعىن كەلتىرگەن. جابىرلەنۋشى بۇل سومانى كۇدىكتىنىڭ جەكە ەسەپشوتىنا اۋدارعان. الايدا كۇدىكتى اقشانى قايتارماعان.
“بۇل فاكتىلەر بويىنشا سوتقا دەيىنگى تەرگەۋ امالدارى باستالدى. كۇدىكتى كىناسىن تولىق مويىندادى”, – دەيدى ءىىم وكىلدەرى.
پوليتسەيلەر تۇرعىنداردى ساق بولۋعا, كۇماندى ادامدار مەن جالعان «كورىپكەلدەردىڭ» ۋادەسىنە سەنبەۋگە شاقىرادى.
