جاڭالىقتار
«بولاشاق» باعدارلاماسىنا وزگەرىس ەندى
فوتو:ۆلاديسلاۆ ۆودنەۆ
«بولاشاق» باعدارلاماسى قوعامنىڭ سۇرانىسى مەن مەملەكەت باسشىسىنىڭ ۇسىنىستارىنا قاراي ۇنەمى جاڭارىپ وتىرادى, دەپ حابارلادى qandastar.kz
«بولاشاق» تاعىلىمداماسىنا جاس شەكتەۋلەرى ەنگىزىلدى. باعدارلاما شارتىنداعى جاڭاشىلدىقتار تۋرالى «حالىقارالىق باعدارلامالار ورتالىعى» اق باسقارما توراعاسى ءادىل قۇسمانوۆ ايتىپ بەردى.
Jibek joly تەلەارناسىنداعى «ۋادە» باعدارلاماسىنا بەرگەن ەكسكليۋزيۆتى سۇقباتىندا ءادىل قۇسمانوۆ ۇلتتىق قۇرىلتاي وتىرىسىندا پرەزيدەنت سىنعا العان 78 جاستاعى عىلىمي تاعىلىمداما قاتىسۋشىسى جونىندە تۇسىنىكتەمە بەردى.
«عىلىمي تاعىلىمداما باعدارلاماسى اياسىندا راسىمەن وسىنداي وقيعا بولدى. بۇعان دەيىن ءبىز ۇمىتكەرلەرگە جاس بويىنشا شەكتەۋ قويمادىق. زەينەت جاسىنا جەتكەندەر دە ءوتىنىش بەرە الاتىن. پرەزيدەنت سىنىنان كەيىن ءبىز مينيستر بۇيرىعىنا وزگەرىس ەنگىزدىك. ەندى عىلىمي تاعىلىمداما ءۇشىن ەر ادامدارعا – 59 جاس, ايەلدەرگە – 57 جاس مەجەسىندە شەكتەۋ قويىلدى. بۇل بۇيرىق بەكىتىلىپ, كۇشىنە ەندى», – دەيدى ءادىل قۇسمانوۆ.
ايتا كەتەيىك, ۇلتتىق قۇرىلتايدىڭ ءتورتىنشى وتىرىسىندا پرەزيدەنت ەلىمىزدە عالىمداردى شەتەلدە تاعىلىمدامادان وتكىزۋ تاجىريبەسى ەنگىزىلگەنىن, الايدا عىلىمعا مۇلدە قاتىسى جوق عالىمدار شەتەل اسقانىن ايتىپ, سىنعا العان بولاتىن.
«مەن 78 جاسىندا «بولاشاق» باعدارلاماسىمەن وقۋعا بارعان كىسىنى بىلەمىن. 78 جاستا قايداعى «بولاشاق»? كوپ ءىستىڭ سوڭى وسىنداي تۇسىنىكسىز جاعدايلارعا ۇلاسىپ كەتەدى», – دەگەن ەدى قاسىم-جومارت توقاەۆ.
