«Bolashaq» baǵdarlamasyna ózgeris endi

Foto:Vladıslav Vodnev

«Bolashaq» baǵdarlamasy qoǵamnyń suranysy men Memleket basshysynyń usynystaryna qaraı únemi jańaryp otyrady, dep habarlady qandastar.kz

«Bolashaq» taǵylymdamasyna jas shekteýleri engizildi. Baǵdarlama shartyndaǵy jańashyldyqtar týraly «Halyqaralyq baǵdarlamalar ortalyǵy» AQ basqarma tóraǵasy Ádil Qusmanov aıtyp berdi.

Jibek joly telearnasyndaǵy «Ýáde» baǵdarlamasyna bergen eksklıýzıvti suqbatynda Ádil Qusmanov Ulttyq quryltaı otyrysynda prezıdent synǵa alǵan 78 jastaǵy ǵylymı taǵylymdama qatysýshysy jóninde túsinikteme berdi.

«Ǵylymı taǵylymdama baǵdarlamasy aıasynda rasymen osyndaı oqıǵa boldy. Buǵan deıin biz úmitkerlerge jas boıynsha shekteý qoımadyq. Zeınet jasyna jetkender de ótinish bere alatyn. Prezıdent synynan keıin biz mınıstr buıryǵyna ózgeris engizdik. Endi ǵylymı taǵylymdama úshin er adamdarǵa – 59 jas, áıelderge – 57 jas mejesinde shekteý qoıyldy. Bul buıryq bekitilip, kúshine endi», – deıdi Ádil Qusmanov.

Aıta keteıik, Ulttyq quryltaıdyń tórtinshi otyrysynda prezıdent elimizde ǵalymdardy shetelde taǵylymdamadan ótkizý tájirıbesi engizilgenin, alaıda ǵylymǵa múlde qatysy joq ǵalymdar shetel asqanyn aıtyp, synǵa alǵan bolatyn.

«Men 78 jasynda «Bolashaq» baǵdarlamasymen oqýǵa barǵan kisini bilemin. 78 jasta qaıdaǵy «Bolashaq»? Kóp istiń sońy osyndaı túsiniksiz jaǵdaılarǵa ulasyp ketedi», – degen edi Qasym-Jomart Toqaev.