«بولاشاققا» قۇجات تاپسىرۋ تاعى وزگەرۋى مۇمكىن

بۇگىن «AMANAT» پارتياسى جانىنداعى جاستاردى قولداۋ جونىندەگى رەسپۋبليكالىق كەڭەستىڭ وتىرىسى ءوتتى. كەڭەستە «بولاشاق» حالىقارالىق ستيپەندياسىن دامىتۋ ستراتەگياسى مەن الداعى يننوۆاتسيالار تالقىلاندى. وتىرىسقا پارلامەنت ءماجىلىسىنىڭ دەپۋتاتتارى, عىلىم جانە جوعارى ءبىلىم ۆيتسە-ءمينيسترى د.ششەگلوۆا, ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ا.سارباسوۆ, «حالىقارالىق باعدارلامالار ورتالىعى» اق باسقارما توراعاسى ءا.وسپانوۆا, مەملەكەتتىك ورگانداردىڭ وكىلدەرى, «بولاشاق» باعدارلاماسىنىڭ تۇلەكتەرى, كەڭەس جانە جاستار ۇيىمدارىنىڭ مۇشەلەرى, جۋرناليستەر جانە ت.ب. قاتىستى. وتىرىستا كەڭەس توراعاسى, دەپۋتات نارتاي سارسەنعاليەۆ «بولاشاق» ستيپەندياسىن دامىتۋدىڭ 2024-2026 جىلدارعا ارنالعان جاڭا ستراتەگياسىن ەسكەرە وتىرىپ, بىرقاتار وزگەرىستەر بولاتىنىن اتاپ ءوتتى.

يننوۆاتسيالار ستيپەنديانىڭ تيىمدىلىگىن جانە قۇجاتتاردى قابىلداۋ مەن كونكۋرستىق ىرىكتەۋدىڭ اشىقتىعىن ارتتىرۋعا باعىتتالاتىن بولادى. قر عىلىم جانە جوعارى ءبىلىم ۆيتسە-ءمينيسترى دينارا ششەگلوۆا ستراتەگيانىڭ جاڭا تارماقتارى بويىنشا بىرقاتار تۇسىنىكتەمەلەر بەردى. سالالىق جانە وڭىرلىك سۇرانىستاردى, قىسقا مەرزىمدى جانە ۇزاق مەرزىمدى ستراتەگيالار مەن دامۋ جوسپارلارىن ەسكەرە وتىرىپ, باسىم ماماندىقتار ءتىزىمىن قالىپتاستىرۋ بويىنشا جۇمىس اياقتالدى, ءتىزىم بەكىتىلۋدە.

سونداي-اق ۇيىمدار مەن كاسىپورىنداردىڭ سۇرانىستارى بويىنشا توپتىق تاعىلىمدامالاردى ەنگىزۋ, پوستدوكتورانتۋرانى ىسكە قوسۋ, اۋىلدىق كۆوتالاردى ۇلعايتۋ مۇمكىندىگى قاراستىرىلۋدا, ستيپەنديادان ايىرىلعان تۇلعالاردان قاراجاتتى قايتارۋ بويىنشا جۇيەلى جۇمىس قۇرىلدى, اي سايىن مەملەكەتتىك بيۋدجەتكە شامامەن 160 ملن تەڭگە قايتارىلادى. «حالىقارالىق باعدارلامالار ورتالىعىنىڭ» باسقارما توراعاسى ءاليا وسپانوۆا ورتالىقتىڭ اتقارىلىپ جاتقان جۇمىستارى تۋرالى حابارلادى. قۇجاتتاردى قابىلداۋ جىل بويى جۇرگىزىلەدى جانە ءساۋىر ايىنىڭ سوڭىندا باستالادى, اۆتوماتتاندىرۋ كونتەكستىندە كونكۋرستىق ىرىكتەۋ پروتسەسى قايتا قارالادى, جەرگىلىكتى اتقارۋشى ورگاندارمەن عىلىمي زەرتتەۋ تاقىرىبى بويىنشا ءوتىنىمدى قالىپتاستىرۋ جانە وڭىرلەردىڭ پروبلەمالارىن ءتيىمدى شەشۋ جانە كەيىننەن جۇمىسقا ورنالاستىرۋ ءۇشىن ءبىلىم الۋشى ستيپەندياتتاردىڭ كۋراتورلىعىن ۇيىمداستىرۋ ماسەلەسى پىسىقتالادى.

ستيپەندياتتاردان تۇسكەن سۇرانىستاردى ەسكەرە وتىرىپ, جاۋاپتى مەملەكەتتىك ورگاندارمەن بىرگە 2012 جىلدان بەرى وزگەرمەگەن ستيپەنديا مولشەرى مەن شىعىستار نورمالارىن قايتا قاراۋ تالقىلانادى. قىسقا مەرزىم ىشىندە ءبىز تاعىلىمدامادان ءوتۋ شارتتارىن جاساسۋ پروتسەسىن تسيفرلاندىردىق. 1-16 اقپان ارالىعىندا TrustMe پلاتفورماسىندا 346 ونلاين كەلىسىمشارت جاسالدى, بۇل ستيپەندياتتار جۇمسايتىن رەسۋرستاردى ايتارلىقتاي قىسقارتتى. «500 عالىم» عىلىمي تاعىلىمدامالار بويىنشا قۇجاتتاردى قابىلداۋدى اۆتوماتتاندىرۋ, ءسىم جانە ەلشىلىكتەرمەن بىرلەسىپ كەپىلدىك حاتتاردى تسيفرلاندىرۋ, ۇمىتكەرلەرمەن جانە ستيپەندياتتارمەن ءوزارا ءىس-قيمىل جاساۋ ءۇشىن ونلاين — پلاتفورما مەن ءموبيلدى قوسىمشا ازىرلەۋ جوسپارلانۋدا, — دەدى ءاليا وسپانوۆا.