الەۋمەت جانە قوعام
بولات وتەمۇراتوۆ قورى كوپبالالى وتباسىلارعا 500 پاتەر سىيلادى
فوتو: اشىق دەرەككوز
قور بەرگەن پاتەرلەر «جايلى» ساناتىنا جاتادى. سونىمەن قاتار استانانىڭ زاماناۋي تۇرعىن ءۇي كەشەندەرىندە ورنالاسقان, دەپ جازادى qandastar.kz بولات وتەمۇراتوۆ قورىنا سىلتەمە جاساپ حابارلايدى.
بولات وتەمۇراتوۆ قورى باسپاناعا مۇقتاج قازاقستاندىقتار ءۇشىن استانا قالاسىنىڭ اكىمدىگىنە جالپى قۇنى 10,5 ميلليارد تەڭگە بولاتىن 500 پاتەردى وتەۋسىز تابىستاۋ پروتسەسىن اياقتادى. «بالامەكەن» قايىرىمدىلىق جوباسى اياسىندا جاڭا پاتەرگە يە بولعاندار قاتارىندا دارىگەرلەر, مۇعالىمدەر, قۇتقارۋشىلار جانە بيۋدجەتتىك سالانىڭ باسقا دا قىزمەتكەرلەرى بار.
بارلىق ۇيلەر جىلدام ليفتىلەرمەن, بەت-الپەتتى تانۋ جۇيەسىمەن, جەراستى اۆتوتۇراقتارىمەن جابدىقتالعان جانە اۋلا اۋماعى كەڭ.
استانا قالاسىنىڭ اكىمى جەڭىس قاسىمبەك بۇل ماڭىزدى ءارى ۋاقىتىلى قايىرىمدىلىق جوباسى ءۇشىن العىسىن ءبىلدىردى.
«بۇل باستاما — بيزنەستىڭ الەۋمەتتىك جاۋاپكەرشىلىگىنىڭ جانە قوعام يگىلىگى ءۇشىن جاسالعان ىنتىماقتاستىقتىڭ جارقىن ۇلگىسى. ازاماتتارىمىزدىڭ ءومىر ءسۇرۋ جاعدايىن جاقسارتۋعا قوسقان ۇلەسى ءۇشىن بولات وتەمۇراتوۆ قورىنا العىسىمىزدى بىلدىرەمىز», — دەپ اتاپ ءوتتى ەلوردا اكىمى.
جاڭا پاتەرگە يە بولعان ءورت ءسوندىرۋشى ەرلان شايحىموۆ ءوز اسەرىن ءبولىستى.
«مۇنداي پاتەردى الۋ – ءبىز ءۇشىن ناعىز مەرەكە. مەن بەس بالانىڭ اكەسىمىن, بۇل – ءبىز ءۇشىن ۇلكەن قولداۋ. ەندى ءبىز بولاشاعىمىزعا سەنىممەن قاراپ, الاڭسىز ءومىر سۇرە الامىز. وسىنداي مۇمكىندىك ءۇشىن العىسىمىز شەكسىز», – دەدى ول.
بولات وتەمۇراتوۆ قورىنىڭ «بالامەكەن» قايىرىمدىلىق جوباسى 2019 جىلى باسپاناعا مۇقتاج قازاقستاندىقتاردى تۇرعىن ۇيمەن قامتاماسىز ەتۋ ماقساتىندا ىسكە قوسىلعان. جوبا اياسىندا اقتوبە, اقمولا, قىزىلوردا جانە تۇركىستان وبلىستارىندا شامامەن 1 000 وتباسى, ونىڭ ىشىندە مۇمكىندىگى شەكتەۋلى جاندار, كوپبالالى وتباسىلار مەن تابيعي اپاتتاردان زارداپ شەككەندەر بار – ءبارى دە ءوز باسپاناسىنا قول جەتكىزدى.
