الەم جاڭالىقتارىجاڭالىقتار
بولگاريالىق جۋرناليست: رەسەيلىك ارنايى قىزمەت توقاەۆتىڭ ۇلىنا قارسى ارنايى وپەراتسيا ازىرلەپ جاتىر
فوتو: اشىق دەرەككوز
بەلگىلى بولگاريالىق زەرتتەۋشى-جۋرناليست حريستو گروزەۆ ۋكراينانىڭ 24 كانال بەرگەن سۇحباتىندا لوندون سوتىندا توقاەۆتىڭ ۇلىنا قارسى دايىندالىپ جاتقان ارنايى وپەراتسيالارعا قاتىستى دالەلدەر ۇسىنىلعانىن ايتتى. بۇل تۋرالى qandastar.kz اقپارات اگەنتتىگى حابارلايدى.
حريستو گروزەۆتىڭ ايتۋىنشا, قازىر رەسەي مەن قازاقستان اراسىنداعى قارىم-قاتىناستار «قاتتى بەرىك ەمەس».
«جاقىندا سوتتا رەسەيلىك بارلاۋ قىزمەتتەرىنىڭ 2023 جىلعا دەيىن قازاقستان پرەزيدەنتىنىڭ ۇلىنا قارسى ارنايى وپەراتسيالار دايىنداعانى تۋرالى دالەلدەر جاريالاندى”, — دەدى حريستو گروزەۆ.
حريستو گروزەۆ ايتىپ وتىرعان ءىس لوندوننىڭ ورتالىق قىلمىستىق سوتىندا قارالىپ جاتىر. بولگاريانىڭ بىرنەشە ازاماتى رەسەي بارلاۋىنا جۇمىس ىستەدى دەپ ايىپتالىپ وتىر.
جيىنداردىڭ بىرىندە بارلاۋشى توپ مۇشەلەرىنىڭ قازاقستان پرەزيدەنتىن قالاي قارالاۋدى جوسپارلاعانى تۋرالى مالىمەتتەر بەلگىلى بولدى. قازاقستانعا جاسالعان اقپاراتتىق شابۋىلدىڭ نىساناسى پرەزيدەنت قاسىم-جومارت توقاەۆتىڭ ۇلى تيمۋر بولۋى مۇمكىن.
ولار استاناعا ىقپال ەتۋ ءۇشىن پرەزيدەنتتىڭ ۇلىنا قارسى كومپروماتتار ويلاپ تاپپاق بولعان دەيدى.
