«بوراتتىڭ مالشىلارىنان ۇتىلدىق»: «قايرات» پەن «سەلتيك» جاتتىقتىرۋشىلارى سۇحبات بەردى

فوتو: Orda.kz 

تاريحي ساتتەن كەيىن «قايرات» پەن «سەلتيك» جاتتىقتىرۋشىلارى سۇحبات بەردى. الدىمەن «سەلتيك» باپكەرى برەندان رودجەرس باق وكىلدەرىنە ءوز جاۋابىن بەردى, دەپ جازدى qandastar.kz

برەندان رودجەرس ءوز ويىنشىلارىنىڭ ويىنىنا كوڭىلى تولماعانىن جاسىرمادى.

«الاڭداعى ءشوپتىڭ بيىكتىگى تومەن بولدى, ياعني الاڭ جۇقالاۋ بولدى دەۋگە بولادى جانە مەنىڭ دە ويىنشىلارىمنىڭ ويىنى ناشار بولدى. مەنىڭ ءوز كوماندامنىڭ ويىنىنا كوڭىلىم تولمادى», – دەدى برەندان رودجەرس.

كەيىن باق وكىلدەرىنە رافاەل ۋرازاباحتين كەلگەن كەزدە بارلىق تىلشىلەر ورنىنان تۇرىپ, قول شاپالاقتاپ, قولداۋ ءبىلدىردى.

چەمپيوندار ليگاسى, قازاقستانعا كەلەتىن توپ كلۋبتار جانە ۇلتتىق قۇرامانى باپتاۋ

«باستى ماقساتىمىز – پرەمەر-ليگاداعى كۋبوكتى جەڭىپ, ەۋروكۋبوكقا جولداما الۋ بولاتىن. ءبىز چەمپيوندار ليگاسىنىڭ توپتىق كەزەڭىنەن شىعامىز دەپ تە ويلامادىق. ىرىكتەۋ كەزەڭىندە قالىپ كەتەمىز دەپ ويلادىق. ازىرگە ناقتى ماقسات قويمادىق», – دەدى ۋرازباحتين.

Orda.kz حابارلاعانداي,   باق وكىلدەرى ۋرازباحتيننەن چەمپيوندار ليگاسىندا قانداي مىقتى كلۋبتارمەن ويناعىسى كەلگەنىن سۇرادى.

«ول تۋرالى ويلانعان دا جوقپىن, بىراق جىگىتتەرگە ەگەر چل-عا شىقساق, وندا جەرەبە كەزىندە قاي كلۋبتارمەن ءتۇسىپ قالاتىنىمىزدى كورسەتتىم. ارينە, كىلەڭ مىقتى كلۋبتار بولدى. ءتىپتى كيىم اۋىستىراتىن بولمەگە ولاردىڭ سۋرەتتەرىن شىعارىپ ءىلىپ قويدىق».

ءوز سوزىندە ۋرازباحتين «سەلتيكتىڭ» الاڭىنداي الاڭ قازاقستاندا دا بولسا جاقسى بولاتىنىن ايتتى. وسى ويىننان كەيىن رافاەل ءۋرازباحتيندى ۇلتتىق قۇرامانىڭ جاتتىقتىرۋشىسى رەتىندە الۋ كەرەك دەگەن وي الەۋمەتتىك جەلىدە قىزۋ تالقىعا تۇسكەن بولاتىن.

«مەن وندايدى ەستىگەن جوقپىن. ماعان ازىرگە ۇلتتىق قۇراماعا باس باپكەرى بولۋعا ەرتە. مەن مۇندا ءالى العاشقى قادامدارىمدى جاساپ كەلە جاتىرمىن».

«سەلتيك» جانكۇيەرلەرىنىڭ پىكىرى

Goal.kz-تەگى ارىپتەستەرىمىزدىڭ مالىمەتىنشە, «سەلتيك» جانكۇيەرلەرى كوماندالارىنىڭ ويىندارىنا رازى ەمەس. بىرەۋى جەڭىلىستىڭ سەبەبى كوماندانىڭ ناشار ويىنىندا دەسە, بىرەۋى «قايرات» سەكىلدى كوماندادان ۇتىلۋ «سەلتيك» ءۇشىن ۇيات دەپ ەسەپتەدى.

«جارايسىڭدار. بىراق «قايراتقا» توپتىق كەزەڭدە ءبىر ۇپاي الۋ ءۇشىن بۇكىل الەمنىڭ ساتتىلىگى قاجەت بولادى. شىنىن ايتسام, سەندەر تاريحتاعى ەڭ ءالسىز «سەلتيكتى» ازەر جەڭدىڭدەر».

كەي جانكۇيەرلەر قازاقستاندى بوراتپەن ۇشتاستىراتىنىن دا جاسىرمادى.

«بوراتتان جانە ونىڭ مالشىلارىنان ۇتىلدىق… ايتار ءسوزىم جوق»,  – دەدى «سەلتيك» جانكۇيەرلەرىنىڭ ءبىرى.

سونداي-اق چەمپيوندار ليگاسىنىڭ توپتىق كەزەڭىندە «قايرات» سوڭعى ورىندا بولاتىنىن ايتتى.

«قايرات توپتىق كەزەڭ كەستەسىندە سوڭعى ورىندا بولادى. «قايرات» مىقتى بولدى دەيسىڭدەر مە? وتىنەمىن, وزدەرىڭدى الداماڭدار. ءبىز جاي عانا وتە ناشار وينادىق».

ال كەي جانكۇيەرلەر «قايراتقا» چەمپيوندار ليگاسىنا ساتتىلىك تىلەپ, ولاردىڭ جەڭىسكە لايىق بولعانىن دا اتاپ ءوتتى.

«جارايسىڭدار, الماتى! جەڭىسكە لايىق بولدىڭدار. ەكى ماتچتا دا بىزدەن گورى جاقسى وينادىڭدار».

«بۇگىن «قايرات» قازاقستاننىڭ «بورات» ەمەس ەكەنىن, فۋتبول, مىنەز جانە ويىنعا دەگەن قۇرمەتى بار ەكەنىن دالەلدەدى. سوندىقتان ستەرەوتيپتەردىڭ ورنىنا قارسىلاسقا قۇرمەت كورسەتىڭدەر, ول مىقتىراق بولىپ شىقتى».

ايتا كەتەيىك, ۋەفا رەيتينگىندە «قايرات» جەڭىستەن كەيىن 203-ءشى ورىننان بىردەن 156-شى ورىنعا كوتەرىلىپ, قوستانايلىق «توبىلدى» ارتتا قالدىردى.

«قايرات» چەمپيوندار ليگاسىندا قانداي توپ كلۋبتارمەن ويناۋى مۇمكىن?

چەمپيوندار ليگاسىنا وتكەن «قايراتپەن» كەز كەلگەن مىقتى كلۋبتار ويناپ قالۋى ىقتيمال.

نازارلارىڭىزعا «قايراتپەن» ويناپ قالۋى مۇمكىن دەگەن مىقتى كلۋبتاردى ۇسىنامىز: پسج (فرانتسيا), رەال مادريد (يسپانيا), بارسەلونا (يسپانيا), بوررۋسيا دورتمۋند (گەرمانيا), چەلسي (انگليا), ينتەر (يتاليا), ليۆەرپۋل (انگليا) جانە باۆاريا (گەرمانيا).

دەرەككوزدەردىڭ مالىمەتىنشە, الماتىلىق «قايرات» جالپى چەمپيوندار ليگاسىنىڭ ىرىكتەۋ كەزەڭىنەن 11,6 ملرد تەڭگە قارجى تاپقان.