جاڭالىقتار
بورتتا 49 ادام بولعان: رەسەيدە ۇشاق اپاتقا ۇشىرادى
رەسەيدىڭ امۋر وبلىسىندا 49 ادام وتىرعان جولاۋشىلار ۇشاعى قۇلادى. قازىر ۇشاقتىڭ سىنىقتارى تابىلدى, دەپ جازدى Qandastar.kz Mash Telegram-ارناسىنا سىلتەمە جاساپ.
اتالعان ارنا رەسەيدە جولاۋشىلار ۇشاعى بايلانىسقا شىقپاي قالعانىن العاشقىلاردىڭ ءبىرى بولىپ حابارلادى.
«امۋر وبلىسىندا رەيس كەزىندە جوعالىپ كەتكەن ان-24 ۇشاعىندا 49 ادام بولعان. ولاردىڭ ىشىندە 38 ەرەسەك جولاۋشى, 5 بالا جانە 6 ەكيپاج مۇشەسى بار», – دەپ جازدى باسىلىم.
كەيىن بۇل اقپاراتتى رەسەي ازاماتتىق اۆياتسيا اگەنتتىگىنىڭ (روساۆياتسيا) رەسمي وكىلى ارتيوم كورەنياكو راستادى.
«امۋر وبلىسىندا روساۆياتسيا رەسەيدىڭ تجم جانە باسقا دا قىزمەتتەرمەن بىرلەسىپ “انگارا” اۋە كومپانياسىنا تيەسىلى ان-24 ۇشاعىن ىزدەستىرىپ جاتىر. ۇشاق بلاگوۆەششەنسكتەن تىندا قالاسىنا بەت العان», – دەدى ول.
كوپ ۇزاماي رەسەي تجم جانعان ۇشاقتىڭ فيۋزەلياجى تابىلعانىن حابارلاپ, قۇتقارۋشىلاردىڭ وقيعا ورنىنا بارا جاتقانىن حابارلادى.
ريا نوۆوستي مالىمەتىنشە, ان-24 ۇشاعى تىندا قالاسىنان 15 شاقىرىم جەردە, تاۋ ەتەگىندەگى قيىن جەردە تابىلعان. الدىن الا مالىمەت بويىنشا, ءتىرى قالعاندار جوق. امۋر وبلىسىنىڭ گۋبەرناتورى ۇشاق بورتىندا 43 جولاۋشى (ونىڭ ىشىندە 5 بالا) جانە 6 ەكيپاج مۇشەسى بولعانىن راستادى.
تاسس اگەنتتىگىنىڭ حابارلاۋىنشا, اپاتتىڭ الدىن الا سەبەبى – ۇشقىشتاردىڭ ناشار كورىنەتىن جاعدايدا قونۋ كەزىندە جىبەرگەن قاتەسى.
تىندا ماڭىندا اپاتقا ۇشىراعان ان-24 ۇشاعىنىڭ كومانديرى – ۆياچەسلاۆ لوگۆينوۆ. ول «انگارا» اۋە كومپانياسىنا جۇمىسقا ورنالاسقانعا دەيىن اقتوبەدەگى ت. يا. بەگەلدينوۆ اتىنداعى اۋە قورعانىس كۇشتەرى اسكەري ينستيتۋتىن بىتىرگەن. يركۋتسك قالاسىندا تۇرعان.
ان-24 ۇشاعىنىڭ بورتسەرىگى اناستاسيا بەسسمەرتنايا بولعان. ول بۇل ماماندىقتا 2007 جىلدان بەرى جۇمىس ىستەگەن. جۇمىس بارىسىندا بورتمەحانيك كۇيەۋىمەن تانىسىپ, وتباسىن قۇرعان. ەرلى-زايىپتىلاردىڭ ەكى قىزى بار.
ان-24 ۇشاعىنىڭ جولاۋشىلارىنىڭ ءبىرى – 55 جاستاعى ەلەنا ۆەليكانوۆا نەمەرەسىنە بارۋ ءۇشىن ساپارعا شىققان. ول حاباروۆسك قالاسىنان 8 جاسار نەمەرەسىن جازعى دەمالىسقا الىپ كەتۋ ءۇشىن كەلە جاتقان.
ەلەنا سوڭعى رەت ساعات 10:04-تە بايلانىسقا شىققان. SMS-حابارلامادا ول: «ۇشاقتامىن, قارسى الىڭىزدار» دەپ جازعان. بالالارىنىڭ ايتۋىنشا, اجەسى مەن نەمەرەسى كەيىن پويىزبەن گورنىي اۋىلىنا, ياعني اجەسىنىڭ ۇيىنە بارۋى ءتيىس بولعان. بيلەتتەردى وتباسى ءبىر اپتا بۇرىن ساتىپ العان. قازىر اتا-اناسى قىزىنا اجەسىنىڭ قازا تاپقانىن ايتۋعا باتپاي وتىر.
قازىر تىندا اۋەجايىندا 40-تان استام ادام ان-24 ۇشاعى جولاۋشىلارى تۋرالى اقپاراتتى كۇتىپ وتىر. جاقىندارىنا كومەك كورسەتۋ ءۇشىن كۋۆىكتا كەنتىندە ارنايى قابىلداۋ پۋنكتى (پۆر) ۇيىمداستىرىلۋدا.
