بورىشتى زەينەتاقىدان ۇستاپ قالۋعا تىيىم سالۋ. ۇكىمەت نەگە بۇعان قارسى?

فوتو:informburo.kz

مينيسترلەر كابينەتى بۇل قادام بانكتەردىڭ زەينەتكەرلەرگە نەسيە بەرۋدى شەكتەۋىنە اكەلەدى دەپ ەسەپتەيدى, دەپ جازدى qandastar.kz

قازاقستاندا بورىشكەر جانداردىڭ ەسەپشوتىنان قارىزدى ءوندىرىپ الۋ تاجىريبەسى قولدانىلادى. بىراق, ۇكىمەت قارىزدى مەملەكەتتىك الەۋمەتتىك ساقتاندىرۋ قورىنان تولەنەتىن جاردەماقىلار مەن الەۋمەتتىك تولەمدەردى جانە تاعى باسقانى اۋدارۋعا ارنالعان بانك شوتتارىنداعى اقشادان الۋعا تىيىم سالعان. بۇل قاتارعا زەينەتاقى تولەمدەرىن قوسۋ تۋرالى ءماجىلىس دەپۋتاتتارىنىڭ ۇسىنىسىنا پرەمەر-مينيستر ولجاس بەكتەنوۆ جاۋاپ بەردى.

ايتا كەتەيىك, قازىرگى تاڭدا زەينەتاقى بۇل جەڭىلدىككە يە تولەم تۇرلەرىنە جاتقىزىلماعان. الەۋمەتتىك كودەكستىڭ 203-بابىنا سايكەس زەينەتاقىدان ۇستاپ قالۋ اتقارۋشىلىق ءىس جۇرگىزۋ تارتىبىمەن جۇرگىزىلۋى مۇمكىن. الايدا, زەينەتاقىدان ۇستاپ قالۋ تولەمى 50 پايىزدان اسپاۋى كەرەك.

«ۇلتتىق بانكتىڭ ۇستانىمى بويىنشا, ەگەر زەينەتاقى تولەمدەرىن ءۇشىنشى تۇلعالاردىڭ ءوندىرىپ الۋىنان تولىق قورعاۋ ەنگىزىلەتىن بولسا, وندا زەينەتكەرلەرگە بەرىلەتىن نەسيەلەردىڭ قايتارىلۋىن قامتاماسىز ەتۋى قيىنعا سوعۋى ىقتيمال. وسىلايشا, بانكتەر ءوز كەزەگىندە اتالعان ساناتتاعى ازاماتتارعا نەسيە بەرۋدى قاتاڭداتۋ نەمەسە ونى توقتاتۋدى قاراستىرۋ مۇمكىن. الايدا, بۇل وسى بانك ءونىمىن پايدالاناتىن زەينەتكەرلەر اراسىندا كەلىسپەۋشىلىك تۋعىزادى», – دەپ جاۋاپ بەردى ولجاس بەكتەنوۆ.

informburo.kz حابارلاعانداي, پرەمەر-ءمينيستردىڭ سوزىنشە, زەينەتكەرلەردىڭ قارىزىن كەشىرۋ بارلىق قارىز الۋشىلاردىڭ, ونىڭ ىشىندە تولەۋ قابىلەتتىلىگى بار ازاماتتاردىڭ نارازىلىعىن تۋدىرۋى, ماسىلدىقتىڭ ءوسىرىپ, كرەديتتىك تارتىپكە تەرىس اسەر ەتۋى مۇمكىن.