«بوس ماقتانۋدى عانا بىلەمىز». پرەزيدەنت كەڭەسشىسى تانىمال زىلتەمىرشىنىڭ كۇزەتشى بولىپ جۇرگەنىنە قىنجىلدى

قارا نار جۇك كوتەرمەس, بەل كەتكەن سوڭ-دەپ قازاق بەكەر ايتپايدى. الماس باۋىرىم:”قارنىمنىڭ اشقانىنا ەمەس, قادىرىمنىڭ قاشقانىنا قىنجىلام”- دەپ سۇحباتىندا ابدەن اعىنان جارىلىپتى.

ايتقانىنىڭ ءبارى راس. وكپەسى ورىندى بالانىڭ. مەملەكەتتىڭ تۋى, وزگە ەلدە, ەكى جاعدايدا كوتەرىلەدى, العاشقىسى, مەملەكەت باسشىسى بارعاندا, سوڭعىسى سپورتشىلارىمىز جەڭىس تۇعىرىنا كوتەرىلگەندە.

الماس قاراپايىم كوپ قارادومالاقتاردىڭ ءبىرى ەمەس. قورجىنعا جۇلدە سالاتىن الەمنىڭ دودالارىندا, قازاقتىڭ كوكبايراعىن كوتەرگەن, ءپىل تابان, ءاپايتوس, تاۋ كوتەرىپ, موينىنا كۇمىس ىلگەن تولاعايىمىز-ەدى عوي…..

سپورتتان كەتكەن سوڭ: “يتتەن ءارى, كىسىدەن بەرى”- كۇيى مىناۋ. ەڭ بولماسا ءزىل تەمىر كوتەرەتىن جاس بۋىنعا اقىلىن ايتىپ, تاجىربيەسىمەن بولىسۋگە جارار ەدى عوي. ونى قاپەرىنە الىپ جاتقان سپورت باسشىلىعى جوق. وكىنىشتى…..

ءبىز ساعىم قۋالاپ, بوس ماقتاننىڭ سوڭىندا كەتكەنىمىزگە قانشا جىلدار بولدى?… جۇلدە السا جۇيرىگىم-دەيمىز. تابانى تايسا, بۇل تاعدىردىڭ بۇيرىعى-دەپ تەز ۇمىتامىز تۋ كوتەرگەن تاۋ تۇلعالارىمىزدى…….

وكىنىشتىسى, بۇگىندە بارلىق سالادا وسى ءۇردىس قايتالانۋدا. قىزمەتتەن كەتسە, زەينەتكە شىقسا, تۇعىرىنان تايسا ءبىز ادام ىزدەمەيتىن بولدىق. وكپە جينالسا, اسەر ەتەدى كوپگە-دەگەن ءسوزدىڭ دە ماعىناسىن ۇمىتپايىق اعايىن…..,

باتىر ماحانبەتتىڭ:”مەن ءبىر الماس قىلىشپىن, قايراۋىن تاپپاي كەتىلگەن. قايراسا قايتا جەتىلگەن”- دەگەن ءسوزىنىڭ استارىندا ءمانى بار اعايىن.

قايراۋىن تاپپاي كەتىلگەن, قانشاما الماس قىلىشتاي ازاماتتارىڭ ءجۇر ورتاڭدا. قايراساڭ قايتا جەتىلمەي مە?

جاۋعا سالار جاۋجۇرەكتەردىڭ باسىن بىتپەس داۋعا سالىپ قويدىق. جەلدىڭ وتىندە, ەلدىڭ شەتىندە جىلقى باعاتىن جىگەرلى جىگىتتەرگە, قوي ەمەس, قوزى باققىزعانىمىزدا قورلىق ەمەس پە? ولارعا…..

“قۇم جىيىلىپ تاس بولماس. قۇل جىيىلىپ باس بولماس”- دەگەن. اشەيىندە اۋىز جاپپاي, بۇيتە بەرسەك, جاۋ كەلگەندە ادام تاپپاي جۇرمەيىك… – دەپ جازدى.