Budan bylaı qurylysy bitpegen úıdi ıpotekaǵa alýǵa tyıym salynady

Senattyń jalpy otyrysynda «Keıbir zańnamalyq aktilerge turǵyn úı qurylysyna úlestik qatysý, avtomobıl joldary jáne múgedektigi bar adamdardy tasymaldaý jónindegi qyzmetterdi kórsetý máseleleri boıynsha ózgerister engizý týraly» zań maquldandy, dep habarlaıdy Qandastar.kz aqparat portaly.

Eki oqylymda qaralǵan zań jobasy úlestik qurylys salasyn memlekettik retteýdi kúsheıtýge, zańsyz qurylys úlesin qysqartýǵa baǵyttalǵan. Sondaı-aq múgedek adamdardyń ómir súrý sapasyn jaqsartýǵa, avtojol salasynyń kadrlyq áleýetin arttyrýdy kózdeıdi.

Aıta keterligi, búgingi tańda, atalǵan sala boıynsha qoldanystaǵy zańnamada úleskerlerdiń qatysýymen turǵyn úı salýdyń 3 tetigimen jumys isteıdi.

1 – tetik: Biryńǵaı operatordyń kepildigi arqyly. Turǵyn úı qurylysyndaǵy úlesi 25,5 %. Biryńǵaı operator bolyp — «Qazaqstan Turǵyn úı Kompanııasy» AQ belgilendi;

2 — tetik: Ekinshi deńgeıdegi bankterdiń turǵyn úı qurylysyna  qatysý arqyly. Bul tetiktiń úlesi — 58,9 %;

3 – tetik: Kóppáterli turǵyn úıdiń qańqasy salynǵannan keıin qarjy tartý. Bul tetik boıynsha turǵyn úı qurylysyndaǵy úlesi 15,6 %).

Jergilikti atqarýshy organdardyń aqparaty boıynsha búgingi tańda úlestik qurylysta problemalyq máseleler áli de oryn alyp otyr.

О́nerkásip jáne qurylys mınıstrliginiń aqparaty boıynsha elimizde turǵyn úı úlestik qurylysyn salý baǵytynda — 99 úı ruqsatsyz salynǵan jáne 42 problemalyq úıler bar.

Halyqtyń múddelerin qorǵaý maqsatynda azamattarǵa turǵyn úıdi qaýipsiz satyp alý týraly keńes berý, belgili bir qurylys salýshylarda JAO ruqsatynyń ne biryńǵaı operatordyń kepildiginiń bolýy týraly aqparat berý úshin Úleskerlerdi qoldaý ortalyǵy qurylady, — dep túsindirdi zań jobasyn senator Súıindik Aldashev.

Al jańa zań boıynsha:

— salynyp jatqan úılerde turǵyn jáne turǵyn emes úı-jaılardy satyp alýǵa baılanysty aldyn ala sharttar jasasýǵa tyıym salý;

— úleskerlerdiń qarjylaryn tartýǵa ruqsatsyz jarnamaǵa tyıym salý;

— salynyp jatqan turǵyn úı naryǵynda úleskerlerdiń aqshasyn tartýdyń zańdylyǵy bóliginde jergilikti atqarýshy organdardyń baqylaý júrgizýi;

— salynyp jatqan kópqabatty turǵyn úıde jyljymaıtyn múlik satyp alýǵa ıpotekaǵa tyıym salý;

— salynyp jatqan turǵyn úıdi tek qolma-qol aqshasyz nysanda satyp alý-satý boıynsha mámileler júrgizý;

— turǵyn úı qurylysynyń josparly merzimin 9 aıdan 5 aıǵa uzartýǵa ruqsat berý.

— ýákiletti kompanııanyń kóppáterli turǵyn úıdiń qańqasy qurylysynyń aıaqtalýyn kútpeı, JAO ruqsatyn alǵannan keıin birden úleskerlerdiń aqshasyn paıdalanýǵa ruqsaty kerek bolady.