«بۇدان دا جانتۇرشىگەرلىك قىلمىستاردى قاراعانبىز»: ايجان قۇلباەۆا بيشىمباەۆ ىسىنە قاتىستى پىكىر ءبىلدىردى

فوتو: اشىق دەرەككوز

اتىشۋلى بيشىمباەۆتىڭ ءىسىن قاراعان سۋديا ايجان قۇلباەۆا ەكس-ءمينيستردىڭ ءىسىن ءوز تاجىريبەسىندەگى ەڭ كۇردەلى دەپ سانامايدى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

Stan.kz-ءتىڭ دەرەگىنشە, سۋديا بيشىمباەۆتىڭ ءىسى مۇنداي دۇربەلەڭ تۋدىرادى دەپ كۇتپەدى.

“مەن مۇنى ادەتتەگى ىستەردىڭ ءبىرى دەپ قابىلدادىم. سوتتا مۇنداي اسا اۋىر قىلمىس جاساعاندار كوپ. بۇدان دا جانتۇرشىگەرلىك قىلمىستاردى قاراعانبىز. سول سەبەپتى بۇل ءىستى تاجىريبەمدەگى ەڭ كۇردەلىسى دەپ سانامايمىن”, – دەيدى ايجان قۇلباەۆا.

“بيشىمباەۆتىڭ ءىسىن نە سەبەپتى ايەل سۋديا قارادى?” دەگەن جۋرناليستەردىڭ سۇراعىنا جوعارعى سوتتىڭ سۋدياسى ەلەنا ماكسيۋتا: “سۋديالارعا ءىستى كومپيۋتەر ۇلەستىردى. بۇل مەحانيزمگە ەشكىم ارالاسا المايدى”, – دەپ جاۋاپ بەردى.

ايجان قۇلباەۆا دا ارىپتەسىنىڭ ءسوز راستاپ, بيشىمباەۆتىڭ ءىسى كەز كەلگەن سۋدياعا ءتۇسۋى مۇمكىن ەكەنىن ايتتى. سونداي-اق ول سوت پروتسەسى كەزىندە الەۋمەتتىك جەلىدە جازىلعان ءبىر جاقتى پىكىرلەردى وقىپ, تاڭعالعان.

“جەلى قولدانۋشىلارىنىڭ مەن تۋرالى جازعان الۋان ءتۇرلى پىكىرلەرىن كورگەندە مۇقالىپ قالدىم. حالىق سوتتىڭ قىلمىستىق قۋدالاۋ ورگانى ەمەس ەكەنىن ۇمىتىپ كەتكەن سياقتى. سوت ايىپتالۋشىنى جانە ونىڭ دالەلدەرىن تىڭداۋى كەرەك. جەلىدەگى پىكىرلەر مەن وعان تاعىلعان ايىپتارعا قاتىستى ونىڭ قانداي ۇستانىمدا ەكەنىن بىلمەك بولعاندا جازىلا باستادى”, – دەيدى ايجان قۇلباەۆا.

سۋديا بيشىمباەۆتىڭ ىسىنەن كەيىن كوشەدە ەركىن جۇرۋدەن قالعانىن ايتادى.

ء“ومىرىم قاتتى وزگەردى دەپ ايتا المايمىن. ءبارى باياعىداي: بۇرىنعى ءىس, سول باياعى ادۆوكاتتار مەن پروكۋرورلار. تەك كوشەدە ەركىن جۇرە الماي قالدىم. قازىر كوپ جەرگە بارا بەرمەيمىن. ويتكەنى ادامدار بىرگە سۋرەتكە ءتۇسۋدى سۇرايدى”, – دەيدى سۋديا.

سونداي-اق ول اتىشۋلى ىستەن كەيىن كۇزەتپەن جۇرەتىن بولعان.