بۇگىن باسپانا كەزەگىنە تۇرۋ پلاتفورماسى ىسكە قوسىلدى. نەنى ءبىلۋىمىز ءتيىس

فوتو: BAQ.KZ

24 مامىر كۇنى ساعات 9:00-دە باسپانا الۋ كەزەگىنە تۇرۋ ءۇشىن ونلاين ءوتىنىش بەرۋ باستالدى, دەپ حابارلايدى Qandastar.kz اقپاراتتىق سايتى.

ازاماتتار ءۇي كەزەگىنە «وتباسى بانكىنىڭ» جاڭا اقپاراتتىق جۇيەسى ارقىلى تۇرا الادى. جۇيەنىڭ اتاۋى – تۇرعىن ۇيمەن قامتاماسىز ەتۋ ورتالىعى. ول orken.otbasybank.kz پورتالىندا ورنالاسقان, جالپى بۇگىننەن باستاپ قازاقستانداعى تۇرعىن ءۇي كەزەگى تولىعىمەن «وتباسى بانكىنىڭ» باسقارۋىنا ءوتتى.

ءوتىنىم بەرگەن كەزدە جۇيە ءسىزدىڭ جاسىڭىزدى, سوڭعى 5 جىلدا تۇرعىن ءۇي يەسى بولماعانىڭىزدى اۆتوماتتى تۇردە تەكسەرەدى. ەگەر بارلىق تالاپتارعا ساي كەلسەڭىز, ءبىر كۇن ىشىندە كەزەككە تۇسەسىز. قوسىمشا قۇجاتتار قاجەت بولسا, مىسالى, ءۇيىڭىزدىڭ اپاتتى جاعدايدا ەكەنىن دالەلدەيتىن انىقتاما وندا ءوتىنىم 3 جۇمىس كۇنىندە قارالادى. دەمالىستا بەرگەن وتىنىمدەر كەلەسى جۇمىس كۇنى وڭدەلەدى.

تاعى ءبىر ەرەكشەلىگى, جۇيە تەك پاتەردىڭ بار-جوعىن عانا ەمەس, ءسىزدىڭ وتباسىڭىزدىڭ الەۋمەتتىك مارتەبەسىن, تابىس دەڭگەيىن, قانداي تولەمدەر الاتىنىڭىزدى تولىق قاراپ شىعادى. مۇنىڭ ءبارى مەملەكەت تاراپىنان قانداي كومەك ۇسىنۋعا بولاتىنىن انىقتاۋ ءۇشىن قاجەت. «وتباسى بانكى» بۇل جۇيەنى 14 ءتۇرلى مەملەكەتتىك دەرەكقورمەن بىرىكتىرىپ, اقپاراتتاردى اۆتوماتتى تۇردە تەكسەرۋگە مۇمكىندىك بەرىپ وتىر. ءوتىنىم بەرىلگەن سوڭ سىزگە جانە وتباسى مۇشەلەرىنە 1414 نومىرىنەن SMS كەلەدى. وندا دەربەس دەرەكتەردى وڭدەۋگە كەلىسۋ سۇرالادى. بۇل حابارلاماعا مىندەتتى تۇردە جاۋاپ بەرۋ كەرەك. جاۋاپ بەرمەسەڭىز, ءوتىنىم قارالمايدى.

ەڭ باستى جاڭالىق, بۇدان بىلاي ۇيگە كەزەككە تەك الەۋمەتتىك وسال توپتار عانا ەمەس, سوڭعى 5 جىلدا باسپاناسى بولماعان كەز كەلگەن ازامات تۇرا الادى. ياعني, ءۇيىم جوق, بىراق جۇمىس ىستەپ, تابىس تاۋىپ جۇرسەم دە, ەندى كەزەككە تۇرۋعا قۇقىعىم بار.