بۇگىن ەلىمىزدە ناۋرىز مەيرامىن تويلاۋ ونكۇندىگى باستالدى

فوتو: اشىق دەرەككوز

بۇگىن ەلىمىزدە ناۋرىز مەيرامىن تويلاۋ ونكۇندىگى باستالدى. ونكۇندىكتىڭ ءار كۇنى ەلىمىزدىڭ مادەني بايلىعى مەن ەرەكشەلىگىن كورسەتەتىن بەلگىلى ءبىر تاقىرىپ پەن قۇندىلىقتارعا ارنالادى, دەپ حابارلايدى qandastar.kz

«ناۋرىزناما» تۇجىرىمداماسى اياسىندا ناۋرىز مەيرامىن تويلاۋ «كورىسۋ كۇنى – امال مەرەكەسىنەن» باستاۋ الادى.

14 ناۋرىز – «كورىسۋ كۇنى – امال مەرەكەسى».
ءداستۇر بويىنشا, بۇل – تۋعان-تۋىستارعا, كورشىلەرگە, جاسى ۇلكەن كىسىلەرگە جانە ت.ب. سالەم بەرەتىن نەمەسە قوناق كۇتەتىن ۋاقىت.

15 ناۋرىز – قايىرىمدىلىق. ياعني قايىرىمدىلىق, مەيىرىم مەن تاتۋ كورشىلىك تاقىرىبىنا ارنالادى.

16 ناۋرىز – شاڭىراق.
بۇل كۇندى وتباسى قۇندىلىقتارىن دارىپتەۋگە ارناۋ ۇسىنىلادى.

17 ناۋرىز – مادەنيەت جانە ۇلتتىق سالت-ءداستۇر كۇنى.
بۇل كۇن مادەنيەتتى, ونەردى جانە ۇلتتىق قۇندىلىقتاردى ناسيحاتتاۋعا ارنالادى.

18 ناۋرىز – ۇلتتىق كيىم كۇنى.
ناۋرىزنامانىڭ ونكۇندىگىندە ۇلتتىق كيىمدەردى تانىمال ەتۋگە جانە ءساندى كيىمدەر كورسەتىلىمىن وتكىزۋگە ەرەكشە نازار اۋدارۋ ۇسىنىلادى.

19 ناۋرىز – جاڭارۋ.
2019 جىلدىڭ ءدال وسى كۇنى ەلىمىزدىڭ جاڭا تاريحىندا مەملەكەت پەن قوعامدا ءتۇبىرلى وزگەرىستەر باستالعان بەتبۇرىستى ساتكە اينالدى.
كۇن رايىنىڭ ىڭعايىنا قاراي وسى كۇنى اعاش وتىرعىزۋ, قورشاعان ورتاعا قامقورلىق تانىتىپ, تازالىق جۇمىستارىنا كوڭىل بولىنەدى.

20 ناۋرىز – ۇلتتىق سپورت.
بۇل كۇنى ۇلتتىق سپورتتان ءتۇرلى جارىستار ۇيىمداستىرۋ ۇسىنىلادى.

21 ناۋرىز – ىنتىماق.
بۇل كۇنى ەلدى مەكەندەردە قولونەرشىلەر جارمەڭكەسىن, مەرەكەلىك كونتسەرتتەر, ۇلتتىق سپورت تۇرلەرى بويىنشا بۇقارالىق جارىستار, شىعارماشىلىققا ارنالعان open space ايماقتارى, ۇلتتىق تاعامداردىڭ گاستروفەستيۆالى, مەرەكەلىك ساۋدا-ساتتىق, جارمەڭكەلەر جانە ت.ب. ءىس-شارالا وتەدى.

22 ناۋرىز – جىل باسى.
وسى كۇنى ورتالىق الاڭداردا مادەني-كوپشىلىك ءىس-شارالار, سپورت سايىستارى وتەدى.

23 ناۋرىز – تازارۋ.
ناۋرىزنامانىڭ قورىتىندى كۇنى جاڭا جىلدى تۇتاس ەل بولىپ جاڭا ماقسات, جاڭا ۇمىتپەن قارسى الۋدىڭ سيمۆولى رەتىندە جالپىۇلتتىق ەكولوگيالىق اكتسيا وتكىزۋ جوسپارلانىپ وتىر.

كورىسۋ – جىلىلىق پەن جاناشىرلىققا تولى مەرەكە. ەجەلدەن 14 ناۋرىز قازاق حالقى ءۇشىن جىلدىڭ باسى سانالعان. ءداستۇر بويىنشا, كوكتەمگى كۇن مەن ءتۇننىڭ تەڭەلۋىنەن تۋرا ءبىر اپتا بۇرىن اتا-بابالارىمىز مالىن تۇگەندەپ, ۇزاق قىستان امان-ەسەن شىققانىنا قۋانىپ, ءبىر-بىرىمەن قاۋىشىپ, ناۋرىز مەرەكەسىن تويلاۋعا دايىندالعان.

«امال مەرەكەسى» قاۋىشۋ كۇنى عانا ەمەس, بۇل ەڭ الدىمەن – ءومىردى جاڭا پاراقتان باستاۋعا, وتكەنگە رازى بولىپ, بولاشاقتى سەنىممەن قارسى الۋعا ۇندەيتىن مەرەكە.

14 ناۋرىزدا قوناققا بارۋ, ۇلكەندەرگە قۇرمەت كورسەتۋ جانە ءبىر-ءبىرىن كوكتەمنىڭ باستالۋىمەن قۇتتىقتاۋ داستۇرگە اينالعان. كورىسۋ كۇنى – ناۋرىزدىڭ العاشقى حابارشىسى جانە ءداستۇرىمىز بەن ورتاق قۇندىلىقتارىمىز بىرىكتىرەتىن ءبىر وتباسى ەكەنىمىزدى ەسكە سالادى.