Búgin elimizde Naýryz meıramyn toılaý onkúndigi bastaldy

Foto: ashyq derekkóz

Búgin elimizde Naýryz meıramyn toılaý onkúndigi bastaldy. Onkúndiktiń ár kúni elimizdiń mádenı baılyǵy men ereksheligin kórsetetin belgili bir taqyryp pen qundylyqtarǵa arnalady, dep habarlaıdy qandastar.kz

«Naýryznama» tujyrymdamasy aıasynda Naýryz meıramyn toılaý «Kórisý kúni – Amal merekesinen» bastaý alady.

14 naýryz – «Kórisý kúni – Amal merekesi».
Dástúr boıynsha, bul – týǵan-týystarǵa, kórshilerge, jasy úlken kisilerge jáne t.b. sálem beretin nemese qonaq kútetin ýaqyt.

15 naýryz – Qaıyrymdylyq. Iaǵnı qaıyrymdylyq, meıirim men tatý kórshilik taqyrybyna arnalady.

16 naýryz – Shańyraq.
Bul kúndi otbasy qundylyqtaryn dáripteýge arnaý usynylady.

17 naýryz – Mádenıet jáne ulttyq salt-dástúr kúni.
Bul kún mádenıetti, ónerdi jáne ulttyq qundylyqtardy nasıhattaýǵa arnalady.

18 naýryz – Ulttyq kıim kúni.
Naýryznamanyń onkúndiginde ulttyq kıimderdi tanymal etýge jáne sándi kıimder kórsetilimin ótkizýge erekshe nazar aýdarý usynylady.

19 naýryz – Jańarý.
2019 jyldyń dál osy kúni elimizdiń jańa tarıhynda memleket pen qoǵamda túbirli ózgerister bastalǵan betburysty sátke aınaldy.
Kún raıynyń yńǵaıyna qaraı osy kúni aǵash otyrǵyzý, qorshaǵan ortaǵa qamqorlyq tanytyp, tazalyq jumystaryna kóńil bólinedi.

20 naýryz – Ulttyq sport.
Bul kúni ulttyq sporttan túrli jarystar uıymdastyrý usynylady.

21 naýryz – Yntymaq.
Bul kúni eldi mekenderde qolónershiler jármeńkesin, merekelik konertter, ulttyq sport túrleri boıynsha buqaralyq jarystar, shyǵarmashylyqqa arnalǵan open space aımaqtary, ulttyq taǵamdardyń gastrofestıvali, merekelik saýda-sattyq, jármeńkeler jáne t.b. is-sharala ótedi.

22 naýryz – Jyl basy.
Osy kúni ortalyq alańdarda mádenı-kópshilik is-sharalar, sport saıystary ótedi.

23 naýryz – Tazarý.
Naýryznamanyń qorytyndy kúni jańa jyldy tutas el bolyp jańa maqsat, jańa úmitpen qarsy alýdyń sımvoly retinde jalpyulttyq ekologııalyq akııa ótkizý josparlanyp otyr.

Kórisý – jylylyq pen janashyrlyqqa toly mereke. Ejelden 14 naýryz qazaq halqy úshin jyldyń basy sanalǵan. Dástúr boıynsha, kóktemgi kún men túnniń teńelýinen týra bir apta buryn ata-babalarymyz malyn túgendep, uzaq qystan aman-esen shyqqanyna qýanyp, bir-birimen qaýyshyp, Naýryz merekesin toılaýǵa daıyndalǵan.

«Amal merekesi» qaýyshý kúni ǵana emes, bul eń aldymen – ómirdi jańa paraqtan bastaýǵa, ótkenge razy bolyp, bolashaqty senimmen qarsy alýǵa úndeıtin mereke.

14 naýryzda qonaqqa barý, úlkenderge qurmet kórsetý jáne bir-birin kóktemniń bastalýymen quttyqtaý dástúrge aınalǵan. Kórisý kúni – Naýryzdyń alǵashqy habarshysy jáne dástúrimiz ben ortaq qundylyqtarymyz biriktiretin bir otbasy ekenimizdi eske salady.