بۇگىن – حالىقارالىق وتباسى كۇنى

فوتو: istockphoto.com

مادەنيەت جانە اقپارات ءمينيسترى ايدا بالاەۆا قازاقستاندىقتاردى حالىقارالىق وتباسى كۇنىمەن قۇتتىقتاپ, چەللەندج باستادى, دەپ حابارلايدى qandastar.kz

قۇرمەتتى دوستار! سىزدەردى حالىقارالىق وتباسى كۇنىمەن شىن جۇرەكتەن قۇتتىقتايمىن! بۇل جۇرەككە جىلى مەرەكە وتىز جىلدان استام ۋاقىت بويى وتباسى اتتى ەڭ قاستەرلى قۇندىلىقتى ەسكە سالىپ, ناسيحات ەتىپ كەلەدى. بىرىككەن ۇلتتار ۇيىمىنىڭ باستاماسىمەن بەكىتىلگەن بۇل كۇن – ءاربىر ادام ءۇشىن ماڭىزدى ماسەلەلەرگە نازار اۋدارۋعا, ياعني قامقورلىق, قولداۋ, ماحاببات جانە بالالارىمىزدىڭ جارقىن بولاشاعى سەكىلدى ىزگى قۇندىلىقتاردى ۇلىقتاۋعا مۇمكىندىك بەرەدى.

بۇگىندە قازاقستاندا 6,2 ميلليوننان استام وتباسى ءومىر سۇرۋدە. مەملەكەت ءۇشىن وتباسىن قولداۋ – جاي عانا باسىمدىق ەمەس, بۇل – تۇراقتى دامۋدىڭ بەرىك نەگىزى. ەلىمىزدە انا مەن بالانى قورعاۋعا ەرەكشە ءمان بەرىلىپ, قاۋىپسىز ءارى لايىقتى ءومىر سۇرۋگە بارلىق جاعداي جاسالۋدا.

بۇل رەتتە جاڭا عانا شاڭىراق كوتەرىپ جاتقان جاس وتباسىلارعا ەرەكشە كوڭىل ءبولىپ, قولداۋ كورسەتۋ ماڭىزدى. ايەلدەر مەن بالالاردىڭ قۇقىعىن قورعاۋعا باعىتتالعان زاڭناما جەتىلدىرىلىپ كەلەدى. قولداۋ تەك ءسوز جۇزىندە عانا ەمەس, الەۋمەتتىك جاردەماقىلار مەن بالا كۇتىمىنە ارنالعان تولەمدەر ارقىلى ناقتى كورىنىس تاۋىپ جاتىر. بۇگىندە ەلىمىزدە 112 وتباسى قولداۋ ورتالىعى جۇمىس ىستەيدى. بۇل ورتالىقتار ازاماتتارعا ومىرلىك ماڭىزدى ماسەلەلەردى شەشۋگە كومەكتەسىپ, پسيحولوگيالىق, قۇقىقتىق جانە الەۋمەتتىك كومەك كورسەتىپ وتىر.

ونىڭ ايتۋىنشا, وتباسى — قوعامنىڭ تەك ءبىر بولشەگى عانا ەمەس. بۇل — ءبىزدى جاقسى كورەتىن, تۇسىنەتىن, قابىلدايتىن اياۋلى مەكەن.

ءدال وسى جەردە تۇلعالىق قاسيەتىمىز قالىپتاسىپ, قۇندىلىقتار مەن ارماندارىمىزدىڭ ىرگەتاسى قالانادى. وتباسى بەرىك بولسا — مەملەكەت تە قۋاتتى بولادى. بالالارىن سۇيىسپەنشىلىكپەن تاربيەلەپ وتىرعان, وتباسىلىق ءداستۇردى ۇقىپپەن ساقتاپ, ۇرپاقتان-ۇرپاققا جەتكىزىپ كەلە جاتقان ءاربىر جانعا شىنايى العىسىمدى بىلدىرەمىن. سىزدەر — ەلىمىزدىڭ تىرەگى, جارقىن بولاشاقتىڭ نەگىزىسىزدەر.

بارشا وتباسىعا شۋاقتى ءومىر, مىقتى دەنساۋلىق, جىلىلىق پەن باق-بەرەكە تىلەيمىن. ءار شاڭىراقتا قۋنىش پەن شاتتىق مول بولسىن!

بۇگىن – تاعى ءبىر ەرەكشە كۇن. ءدال وسى كۇنى «مەرەيلى وتباسى» ۇلتتىق بايقاۋىنا ءوتىنىم قابىلداۋ باستالادى. قازاقستاننىڭ ءار وڭىرىندە وزگەلەرگە ۇلگى بولاتىن, تاعىلىمدى تاريحى بار وتباسىلار بار ەكەنىنە سەنىمدىمىن. بارشاڭىزدى وسى ماڭىزدى ءارى ىزگى بايقاۋعا قاتىسۋعا شاقىرامىن. سىزدەردىڭ ومىرلىك تاجىريبەلەرىڭىز كوپشىلىككە شابىت سىيلايتىنى ءسوزسىز.

سونىمەن قاتار, سىزدەردى وتباسى كۇنىنە ارنالعان ونلاين-چەللەندجگە قاتىسۋعا شاقىرامىن!
#وتباسىكۇنى2025 جانە #دەنسەمي2025 حەشتەگتەرىمەن جۇرەككە جىلى فوتولارىڭىزدى, وتباسىلىق تاريح پەن داستۇرلەرىڭىزدى بولىسىڭىزدەر. ونەگەلى ومىرلەر, بەرەكەلى وتباسىلار بارشامىزعا ۇلگى!», — دەپ جازدى ول.