بۇگىن قازاقتان شىققان تۇڭعىش ۇشقىش قىز حيۋاز دوسپانوۆانىڭ تۋعان كۇنى

فوتو: novoetv.kz

وسىدان 103 جىل بۇرىن (1922-2008) قازاقتان شىققان تۇڭعىش ۇشقىش قىز, شتۋرمان-اتقىش, ەكىنشى دۇنيەجۇزىلىك سوعىس ارداگەرى, حالىق قاھارمانى حيۋاز قايىرقىزى دوسپانوۆا دۇنيەگە كەلگەن, دەپ حابارلايدى qandastar.kz سايتى.

اتىراۋ وبلىسىندا تۋعان. 1940 جىلى ورالداعى №1 ورتا مەكتەبىن ۇزدىك بىتىرگەن.

ۇشقىشتىق ءومىر جولىن ورال اەروكلۋبىندا باستاپ, كەيىن سوعىسقا اتتانادى. حيۋاز دوسپانوۆا سول كەزدىڭ وزىندە تەڭدەسسىز ەرلىگى ءۇشىن «قاناتتى قىز» اتانعان. حيۋاز قىزمەت ەتكەن پولك سولتۇستىك كاۆكاز, كۋبان, قىرىم, ۋكراينا, بەلارۋس, پولشا, گەرمانيا اسپانىنداعى شايقاستارعا قاتىسقان. قازاق قىزى قان مايداندا 300-دەن اسا جاۋىنگەرلىك وپەراتسيا ورىنداپ, اسا ماڭىزدى جاۋ شەبىن تالقاندايدى. سوعىستا اسكەري ۇشاقپەن اسپان تورىندە ەرلىگىمەن تانىلعان, ال سوعىستان كەيىنگى بەيبىت ومىردە قايراتكەرلىگىمەن دارالانعان قازاقتىڭ قاھارمان قىزى. 2008 جىلى 21 مامىردا الماتى قالاسىندا 86 جاسىندا دۇنيەدەن وزدى. وجەتتىلىگى مەن ەرلىگى ءۇشىن قىزىل جۇلدىز, ءىى دارەجەلى وتان سوعىسى, قىزىل تۋ وردەندەرىمەن جانە كوپتەگەن مەدالدارمەن ماراپاتتالعان.

جەڭىستىڭ 60 جىلدىق مەرەيتويى قارساڭىندا سوعىس ارداگەرى, ۇشقىش قىز حيۋاز دوسپانوۆاعا قازاقستان رەسپۋبليكاسى پرەزيدەنتىنىڭ جارلىعىمەن «حالىق قاھارمانى» اتاعى بەرىلدى. اتىراۋ قالاسىندا ەسكەرتكىش ورناتىلىپ, ونىڭ ەسىمى ءبىر كوشەگە بەرىلگەن. جەڭىستىڭ 75 جىلدىعى قارساڭىندا اتىراۋ حالىقارالىق اۋەجايىنا اتى اڭىزعا اينالعان ۇشقىشتىڭ ەسىمى بەرىلدى.