Búgin – Temirjol qyzmetkerleri kúni

Foto: QTJ

Qazaqstanda kásibı merekeler kúntizbesi jańa mańyzdy datamen tolyqty. Bıyldan bastap tamyz aıynyń birinshi jeksenbisi – Temirjol qyzmetkerleri kúni retinde resmı túrde atalyp ótedi. Bul – kólik salasynyń mańyzdy baǵyty sanalatyn temirjol júıesinde qajyrly eńbek etip júrgen myńdaǵan qyzmetkerdiń eńbegine kórsetilgen qurmettiń aıǵaǵy, dep habarlaıdy Qandastar.kz BAQ.KZ-ke silteme jasap. 

Temirjol – el ishindegi ǵana emes, halyqaralyq deńgeıdegi jolaýshy jáne júk tasymalynyń mańyzdy tetigi. Qazaqstandaǵy kólik ınfraqurylymynyń dińgegi sanalatyn bul salada on myńdaǵan maman jumys isteıdi. Olardyń qatarynda mashınıster, vagonshylar, jol jóndeýshiler, dıspetcherler, baılanysshylar, ınjener-tehnıkter men taǵy basqa kóptegen kásip ıeleri bar.

Kólik salasynyń jalpy damýyna da temirjol salasy orasan úles qosyp otyr. О́ńirler arasyndaǵy ekonomıkalyq baılanysty qamtamasyz etý, otandyq ónimdi eksporttaý, jolaýshylardyń qaýipsiz ári yńǵaıly qozǵalysyn uıymdastyrý – osynyń barlyǵy temirjolshylardyń tynymsyz eńbeginiń nátıjesi.

Temirjol salasynda jumys isteý – jaýapkershiligi joǵary, tártip pen tózimdilikti talap etetin mamandyq. Bul mereke – temirjolshylardyń eńbegin baǵalap, olardyń qoǵamdyq mańyzyn aıshyqtaıtyn kún.

Temirjol qyzmetkerlerin kásibı merekesimen quttyqtaımyz! El ekonomıkasynyń qozǵaýshy kúshine aınalǵan sala mamandaryna myqty densaýlyq, qaýipsiz eńbek jáne tolaǵaı tabys tileımiz.

Tolyq nusqasyna gıpersilteme berýdi umytpańyz: https://turkystan.kz/article/265073-bugin-temirzol-qyzmetkerleri-kuni