جاڭالىقتار
بۇگىن – ۆەتەرينارلار كۇنى
2002 جىلى 10 شىلدەدە «ۆەتەريناريا تۋرالى» قازاقستان رەسپۋبليكاسىنىڭ زاڭى قابىلداندى. 2024 جىلى 10 شىلدەدە العاش رەت «ۆەتەرينارلىق قىزمەتكەر كۇنى» اتالىپ ءوتىلدى.
ۆەتەريناريالىق قىزمەت ءاردايىم ەپيزووتيالىق سالاۋاتتىلىقتى ساقتاۋ بويىنشا قيىن جانە وتە ماڭىزدى جۇمىستاردى اتقاردى. ونىڭ نەگىزگى مىندەتتەرى – ەپيزووتياعا قارسى جانە ەمدەۋ-پروفيلاكتيكالىق ءىس-شارالار كەشەنىن ۋاقتىلى جۇرگىزۋ.
ناقتى ۆەتەرينارلىق ماماندار كۇندەلىكتى جۇمىسىمەن جانۋارلاردىڭ دەنساۋلىعىن قورعاۋدى قامتاماسىز ەتەدى جانە ادامدى اۋرۋلاردان قورعايدى, ەپيزووتيالىق ءال-اۋقاتتى قامتاماسىز ەتۋگە ايتارلىقتاي ۇلەس قوسادى.
مەملەكەت باسشىسى قاسىم-جومارت كەمەل ۇلى توقاەۆ 2021 جىلعى 01 قىركۇيەكتەگى قازاقستان حالقىنا جولداۋىندا ۆەتەريناريا – مەملەكەتتىڭ بيولوگيالىق قاۋىپسىزدىك جۇيەسىنىڭ ءبىر بولىگى ەكەنىن اتاپ ءوتتى.
ۆەتەريناريالىق قىزمەتتىڭ ماقساتى – اۋىل شارۋاشىلىعى جانۋارلارىنىڭ اۋرۋلارىنىڭ الدىن الۋ جانە جويۋ, ولاردىڭ ساقتالۋىن جانە ونىمدىلىگىن ارتتىرۋدى قامتاماسىز ەتۋ, مال شارۋاشىلىعى ونىمدەرىنىڭ ساپاسىن جاقسارتۋ, سونداي-اق حالىقتى ادامدار مەن جانۋارلارعا ورتاق اۋرۋلاردان قورعاۋ.
ۋاقتىلى جۇرگىزىلەتىن ۆەتەريناريالىق ءىس-شارالاردىڭ جانە ساپالى باقىلاۋدى جۇزەگە اسىرۋدىڭ ارقاسىندا ازاماتتار مال شارۋاشىلىعىنىڭ قاۋىپسىز ءونىمىن تۇتىنادى.
ۆەتەرينارلىق قىزمەتكەر كۇنى-بۇل قيىن ماماندىقتى تاڭداعانداردىڭ بارلىعىنا العىس سوزدەرىن ايتۋعا قوسىمشا مۇمكىندىك بەرەتىن مەرەكە. ۆەتەريناريالىق قىزمەتتىڭ بەدەلى بارلىق دەڭگەيدەگى مامانداردىڭ جانقيارلىق, ۇيلەسىمدى جۇمىسىنىڭ ارقاسىندا جىل سايىن نىعايىپ كەلەدى.
