بۋكمەكەرلەردىڭ قۇرىعىنا تۇسپەۋدىڭ جالعىز جولى — شىندىققا تۋرا قاراۋ — “جاڭا ادامدار” بەلسەندىسى

قازاقستاندىقتار قۇمار ويىندارعا ءوز دەنساۋلىعىنا قاراعاندا ەكى ەسە كوپ قارجى جۇمسايدى. نەبارى سوڭعى ءۇش ايدىڭ ىشىندە قازاقستان ازاماتتارى ءجۇز ميللياردقا جۋىق تەڭگەگە ۇتىلىپ قالعان. سوڭعى بىرنەشە جىلدا ەلىمىزدە قۇمار ويىندار نارىعى ءۇش ەسەگە دەيىن ءوسىپ,  قوعامنىڭ باستى الەۋمەتتىك اۋرۋلارىنىڭ ءبىرى لۋدومانيا كەڭ ەتەك جايىپ جاتىر. لۋدومانيا وتباسىلاردى بۇزادى, حالىقتى پەرمانەنتتى ەكونوميكالىق جانە تۇلعالىق كريزيسكە ۇشىراتىپ, باسقا دا تاۋەلدىلىك تۇرلەرىنە, اتاپ ايتقاندا, ماسكۇنەمدىك, ەسىرتكىگە تاۋەلدىلىك, سەلفحارمانى قوزدىرىپ, ءوزىن-ءوزى ولتىرۋگە دەيىن الىپ كەلەدى.

ادامدار وڭاي جولمەن بايىپ كەتەتىنىنە سەنگىسى كەلەدى. سونداعىسى, ء«ساتتى تۇسەدى» دەگەن ءبىر ويىن. بۋكمەكەرلەر حالىقتىڭ وسى قالاۋىن ءوز ماقساتىنا پايدالانۋعا تىرىسادى. ياعني, تەز ۇتىس جانە سانسىز اقشا ۋادەلەرىمەن وزىنە تارتادى, ۇتىس تىگۋدىڭ زياندارىن ايتپاي, تەك الەۋەتتى ارتىقشىلىقتارىن العا تارتادى. بۇل — ادىلەتسىزدىك. جاي عانا الداۋ.

جاڭا ادامداردىڭ «ستاۆكي نا ستوپ» جوباسى استاناداعى تانىمال بۋكمەكەر كەڭسەسىنىڭ جارنامالىق باننەرىن قۇمار ويىندارىنىڭ بارلىق كورىنىسىن اشاتىن وزدەرىنىڭ «شىندىق باننەرىمەن» جاۋىپ تاستادى. ستاتيستيكا بويىنشا, قۇمار ويىنعا تاۋەلدى ادامداردىڭ 40% وتباسىنان ايىرىلسا, 20% ءتۇرلى قىلمىستار جاساۋعا بارادى. ادەتتەگى قۇمار ويىنشىنىڭ ورتا ەسەپپەن قارىزى 10 ميلليون تەڭگەنى قۇرايدى. مىنە, بكمەكەر كەڭسەلەرىنىڭ شىنايى جارناماسى وسىلاي بولۋ كەرەك.

عاريفوللاەۆ مەيىرجان, “جاڭا ادامدار” بەلسەندىسى:
قازىر ەلىمىزدە بۋكمەكەرلىك كەڭسەلەردىڭ جارناماسىن شەكتەۋ تۋرالى زاڭ تالقىلانىپ جاتقانىن بىلەمىز. وسى ورايدا بار كۇشىمىزبەن كۇرەسىپ, ادامداردى بۇل قاۋىپتى تاۋەلدىلىكتەن الىپ شىعۋ ماڭىزدى. ءبىر نارسەنى ءتۇسىنۋىمىز كەرەك: بۋكمەكەرلىك كەڭسەلەردىڭ قۋلىعىنا ءتۇسىپ قالماۋ ءۇشىن تەز ءارى وڭاي جولمەن كەلەتىن اقشاعا سەنۋدى توقتاتۋ كەرەك. بايلىققا جەتۋدىڭ وڭاي جولى جوق. ءبىزدىڭ وزىندىك شىعارماشىلىعىمىز, ەڭبەكسۇيگىشتىك پەن پراگماتيزم — مىنە ناعىز بايلىققا جەتۋ جولدارى. شىندىققا تۋرا قاراي بىلەيىك. بۋكمەكەرلەردىڭ قۇرىعىنا تۇسپەۋدىڭ جالعىز جولى — اقشانىڭ اسپاننان تۇسپەيتىنىنە سەنۋدى توقتاتۋ.

“Qandastar” سىلتەيدى