«بۇل – جالعان»: بالالار ومبۋدسمەنى جاڭا زاڭعا قارسى پەتيتسيا تۋرالى پىكىر ءبىلدىردى

قازاقستانداعى بالا قۇقىقتارى جونىندەگى ۋاكىل دينارا زاكيەۆا تۇرمىستىق زورلىق-زومبىلىق تۋرالى زاڭعا قارسى ۇيىمداستىرىلعان جاڭا پەتيتسيا تۋرالى ايتتى,-دەپ حابارلايدى Qandastar.kz

بالالار ومبۋدسمەنى نەگە بۇل پەتيتسيادا ايتىلعان مالىمەتتەر قاتە ەكەنىن ءتۇسىندىردى. «اۆتوردىڭ نەگىزگى يدەياسى مىنادا: بۇل زاڭ وقۋ پروتسەسىن قىلمىستىق جاۋاپكەرشىلىككە تارتىپ, بالالاردى وقۋدان شىعارۋدىڭ قاراپايىم تەتىگىن ەنگىزەدى جانە ازاماتتاردىڭ جەكە ىستەرىنە ارالاسۋ قۇقىعىنا يە قۇرىلىمدى جاسايدى دەلىنگەن.

بۇل – جالعان! بۇل زاڭدا بالالاردى الىپ كەتۋ تۋرالى بىردە-ءبىر نورما جوق. وسى زاڭ ارقىلى ەل پرەزيدەنتى قاسىم-جومارت توقاەۆ قوعامدا زورلىق-زومبىلىققا جول بەرمەۋ مادەنيەتىن قالىپتاستىرىپ, ادامدى, ونىڭ ىشىندە بالانى ۇرىپ-سوعۋعا جول بەرمەيتىن, زاڭدىلىق پەن ءتارتىپ الدىڭعى قاتاردا بولاتىن قوعام قۇرۋ مىندەتىن قويدى.

وسى زاڭعا قارسى شىققانداردىڭ بارلىعىنا ەڭ الدىمەن ونى وقىپ شىعىپ, بالالارعا قاتىستى قىلمىستىق ىستەر بويىنشا جۇمىسىمىزعا كومەكتەسۋدى ۇسىنامىن. ءبىر رەت بولسا دا كۇندەلىكتى ەسەپتى كورىپ, بالالارمەن سويلەسىپ, ولاردىڭ باسىنان وتكەرگەندەرىن تىڭداپ, كەيىن جازانى قاتايتۋ قانشالىقتى ماڭىزدى بولعانىن تۇسىنەسىز», – دەدى دينارا زاكيەۆا جازباسىندا.

بالالار قۇقىقتارى جونىندەگى ۋاكىل بىلتاردان بەرى وسى ماسەلە بويىنشا قانشاما شارا وتكىزىلگەنىن جەتكىزدى. «ەلىمىزدىڭ 220 ەلدى مەكەنىن ارالادىق. ەندەشە بۇل زاڭنىڭ كەرەگى جوق دەپ داۋ ايتپاس بۇرىن, اۆتورلارعا دا سول جولمەن ءجۇرىپ وتۋگە كەڭەس بەرەمىن. بارلىعىمىزدىڭ قولىمىزدا قالام بار, بىراق مۇنداي ىستەردە ناتيجە تەك ناقتى ءىس-ارەكەتتەن, كۇندەلىكتى جۇمىس پەن قادامنان تۇرادى.

قاۋىپسىز قوعامداعى ەلدىڭ اماندىعى تۋرالى ءبارىمىز ايتىپ جاتىرمىز. ەلدىڭ ءال-اۋقاتى وتباسىنىڭ جانە ءاربىر ادامنىڭ, سونىڭ ىشىندە كىشكەنتاي ازاماتتىڭ اماندىعىنان تۇرادى», – دەدى ول.